作為Café怪，流連上環一帶就必然，行開行埋，實有留意到歌賦街呢幾日多咗間新Café” Grain of Salt”！店子由係註冊營養師主理，食物宗旨就係營養與味道兼備！加上充滿異國氣息嘅橘白色圓拱門裝修，裡裡外外都質量滿滿，相信好快又會成為啡控集中地！
內容目錄
一年籌劃 重質不重量 精緻到底
據Grain of Salt IG分享，店子由籌備、設計到建成，前前後後用咗一年！真係好難想像到，喺寸金尺土嘅香港地，竟然有人會用一年時間去籌劃咖啡店！另外，細心走一圈Grain of Salt，你會發覺店子雖然有三層，但實際比客人enjoy嘅只有地舖範圍！二樓係店主嘅office，地庫則係儲物室。仲要地舖加埋都係得十個座位左右咋！從呢啲細節中，不難感受到店主嘅用心，旨在為客人塑造舒適空間、重質不重量（同埋很有錢）。
食品營養與味道兼備 迎合新生代飲食需求
你是否覺得節食就會瘦？瘦就得於健康？Grain of Salt比到我好強烈感覺係，如佢所座右銘所講，健康最應該關注營養均衡！食嘢最緊要「夠」，唔好自以為份量少或低卡即係好，身體若無足夠熱量如何正常運作？呢度都不乏高卡食物，如牛油果toast、smoothies，但食物都盡量天然高營為主。
其次係唔好人云亦云，每個人身體狀況都唔同，應該按個人需要，搵適合自己嘅營養方案。店家係每次消費到指定金額後，都會送一個印仔，儲滿10個印仔就可以上二樓，搵店主做個健康評估，正常睇一次營養師都要幾百蚊，飲咖啡又可以關注個人健康，感覺幾佛心呢！
✦ Beetroot Cacao Latte HK$50
好少見到Latte會加甜菜，甜菜本身營養價值好高，補血、抗氧化及通便，不過隻味唔係個個受，包括我…😂
店家巧妙地將佢加入濃味嘅可可，cover咗甜菜嘅青澀味，連我呢種咁抗拒嘅人都飲得到，抵讚！至於味道，呢杯latte確係好重可可味，難得嘅係仲要唔算甜，飲完都有種reflesh嘅感覺。
✦ Liquid Gold HK$50
又係我係出面Cafe好少見嘅latte配料「薑黃」！功效係降低膽固醇、預防心血管疾病、防癌及抗炎等等，呢款latte係三款latte中最淡味，但後勁幾強，有種辣口感，但薑味唔算重。
✦ Chai Latte HK$50
Chai Latte好多Cafe都有，用咗印度嘅辛香料製作。呢度飲到嘅版本，我覺得口感係特別滑，荳蔻及肉桂味都幾明顯，仲有微酸，後勁則有點薄荷嘅清新感，相當特別呢。
編輯評審
味道：3.5
環境：4
服務：4
CP值：3.5
（*5為最高分）
【詳情】
Grain of Salt
地址：香港島中區蘇豪區歌賦街47號
FB： @grainofsalthk | IG：@grainofsalthk
