一元復始，萬象更新。為迎接辛丑牛年，香港港麗酒店樂聚廊（Lobby Lounge）與明茶房攜手呈獻「福澤春茶」下午茶！下午茶將以明茶房多款優質名茶入饌，加上行政總廚Claudio Rossi精選嘅高貴食材，拼奏打造出11款富新春氛圍嘅鹹甜美點。除咗堂食，下午茶亦另設外攜版，無論係自用或送禮都皆宜，滋味令人無法抗拒。
內容目錄
大紅、黃金色調 新春好兆頭
「福澤春茶」下午茶以中西合璧手法呈現，有鮑魚、雞肉及冬菇茸做嘅酥餅，又有用茶凍做嘅鴨肝，以至以芝士配桂花做嘅蛋糕……為味蕾帶來新體驗。賣相方面，鹹甜美點均以大紅及黃金色為主調，洋溢新年嘅吉祥氣息，好有意頭。
✦ 甜點
包括： 至尊桂花芝士蛋糕、茉莉銀毫軟芝士法式閃雷泡芙、高山烏龍牛奶朱古力慕絲、焗燕窩蛋撻、招牌傳統合桃酥、迷你叉燒酥、 原味和杞子鬆餅
成個set裏面，我最鍾意就係焗燕窩蛋撻！入口鬆化，燕窩量有好多，感覺好滋潤！其次，我覺得好有驚喜既係杞子鬆餅！平時食開嘅鬆餅都係提子乾喺入面，呢隻係杞子，好有新年氣氛！而且口感都唔錯！
金葉庭嘅叉燒酥，無得輸，好正！至於桂花芝士蛋糕，我覺得有淡淡嘅草本貴花清香，芝士都好creamy，入口唔會話好有負擔。
✦ 鹹點
包括： 迷你鮑魚撻、鴨肝醬凍餅、阿拉斯加蟹肉沙律伴三文魚籽、香燒鴨肉刈包
迷你鮑魚撻係一定要食！入面有雞肉同埋冬菇茸！好香口！阿拉斯加蟹肉沙律伴三文魚子，外面有用紅菜頭做嘅威化餅，睇上去紅卜卜，好特別，至於入面則填滿蟹肉及三文魚籽，整體口感豐富。鴨肝醬會比較膩，但係主廚好有心思咁，喺上面加咗一層明前龍井果凍， 入口細膩，送茶一流。
✦ 茶品
包括：茉莉仙桃、古方鐵觀音
下午茶嘅飲品可以揀兩款茗茶，包括明茶房專利嘅茉莉仙桃，春芽同埋仙桃花綑繩球，泡個熱水，茶花球就會鬆開，成為一粒綻放喺水中嘅花球，有花開富貴嘅寓意。至於鐵觀音，係用來自安溪縣嘅烏龍，經過20個幾鐘頭嘅木炭火低溫烘焙而成，茶香濃郁，帶有一啲甘甜餘韻，配茶點食至正！
紅噹噹外攜下午茶盒 將喜慶帶回家
「福澤春茶」外攜版下午茶亦附送明茶房茶包兩份，今次系列喺外攜三層架蓋盒上換上緋紅新裝，為新年節慶倍添氣氛！另外，享過美點後可沿蓋盒兩旁嘅虛線撕去印有「富貴吉祥」及「年年豐收」嘅揮春，實踐希爾頓環保及可持續發展理念。
由即日起於ConradDining.HungryTuesday.com網上預購外攜下午茶，仲可以有9折優惠，以滋味美點共迎辛丑牛年。
編輯評審
味道：4
環境：4
服務：4.5
CP值：3.5
（*5為最高分）
【詳情】
樂聚廊Lobby Lounge 聯乘明茶房「福澤春茶」下午茶
供應日期：即日至2月28日（堂食及外攜）
價格：HK$558（2人）
地址：香港金鐘道88號太古廣場香港港麗酒店大堂樓層
預訂：致電 (852) 2822 8891 或瀏覽ConradDining.com
* 另收取加一服務費
