踏入二月，正是福岡縣草莓當造之時，當中以「博多甜王」品種最受港人歡迎！
甜王正熟，又適逢情人節，日法餐廳Briketenia便聯同日本福岡縣香港事務所，合作推出期間限定嘅「博多甜王草莓浪漫二人下午茶」，餐廳仲特意加人戀愛祈福元素，頭50名成功訂怡客人，均會獲贈「戀木神社」祈福繪馬小木牌，好讓大家寫下願望及祝福，喺來年心想事成！
內容目錄
日藉大廚主理 博多甜王鹹甜品
Briketenia嘅日藉主廚中西潤也（Junya Nakanishi），今次特地精選博多甜王入餚，帶來了11款鹹甜美點！當中以長崎豪斯登堡蜂蜜蛋糕做嘅甜點、草莓蛋糕卷及八女抹茶吉士忌廉泡芙最為觸目，味道令人一試難忘！鹹點一定要試巴馬火腿配草莓，以草莓取代蜜瓜，口感帶酸甜味，令人開胃。
✦ 甜點
包括： 心型草莓慕絲、草莓蛋糕卷配八女抹茶、 八女抹茶吉士忌廉泡芙、 長崎豪斯登堡蜂蜜蛋糕配博多甜王草莓、博多甜王草莓奶凍、新鮮博多甜王草莓杯（另加HK$50）
成個系列，我最愛係八女抹茶吉士忌廉泡芙，抹茶濃郁，零青澀味，入口即溶，真係正到不得了！其次，草莓蛋糕卷配八女抹茶都好正，好鬆軟，入口即溶，又有濃郁嘅草莓及八女抹茶奶凍，好正！長崎豪斯登堡蜂蜜蛋糕好出名，估唔到呢度其中一款甜品會配搭博多甜王出，蛋糕香甜，草莓肉爽脆，味道都唔錯！另外，嫌唔夠喉，仲可以加HK$50加配博多甜王草莓杯，爽啪大大粒福岡靚草莓！開心仔！
✦ 鹹點
包括： 芝士火腿牛角包、日本蛋三文治、巴馬火腿配草莓、迷你漢堡、英式鬆餅配草莓果醬
相對甜點，鹹點係會有少少比下去！不過，食下午茶，時鹹時甜先正！巴馬火腿配草莓係幾特別嘅搭配，因為博多甜王夠甜，所以都襯托到火腿嘅鹹香，不錯。至於迷你漢堡及芝士火腿牛角包就麻麻地，可能擺耐咗，有啲乾。
繪馬收集站 直送福岡戀木神社
吃完下午茶，大家仲可以將寫好嘅繪馬小木牌，步行至北角滙一期地下「福网魅力情報站」嘅「戀木神社」繪馬收集站中掛好，那邊有一個神社背景照，供大家拍照打卡用。福岡縣香港事務所之後會將大家嘅繪馬寄回位於福岡嘅戀木神社，由專人掛上神壇，為大家祈福。
編輯評審
味道：3.5
環境：4
服務：4
CP值：3.5
（*5為最高分）
【詳情】
Briketenia
地址：北角渣華道123號北角匯2期2樓206號舖
FB：@briketeniahongkong ｜ IG：@briketenia_hk
