臨近復活節，Hotel ICON又有新搞作，今次與朱古力品牌LINDT瑞士蓮合作，打造出限定LINDT朱古力下午茶套餐，比大家喺GREEN度過甜蜜春季。今次LINDT朱古力下午茶，由酒店糕餅行政總廚何偉誠師傅（Danny Ho）以LINDT香濃幼滑嘅朱古力入饌，優雅三層架共有11鹹甜點心，並加入大量復活節元素，好似可敲破嘅朱古力蛋、字母蛋糕磚、迷你胡蘿蔔…..等，食、玩、打卡一條龍享受！
內容目錄
✦ 經典配搭
包括：英式傳統鬆餅配奶油忌廉及果醬、十字包
今次除咗平常嘅鬆餅，仲有十字包！造型精緻，奶油味都幾重，配雜莓醬一流。
✦甜點
包括：滋味蛋形芒果奶凍、迷你胡蘿蔔、榛子朱古力撻、LINDT朱古力蛋、椰子牛奶白兔布丁、字母蛋糕磚、法式花形千層酥、朱古力杯子蛋糕、任食LINDT軟雪糕
多款甜品中，小編最印象難忘就係滋味蛋形芒果奶凍！睇落係蛋，但其實完全無蛋嘅成份，「蛋黃」用芒果＋熱情果做，「蛋白」則係椰子牛奶 mousse，酸酸甜甜，幾醒胃。另外，字母蛋糕磚都好得意，切開係朱古力夾心蛋糕，食上口卻唔會好甜！另外，呢個T仲有得任食由LINDT 70％特濃朱古力製成嘅軟雪糕，作為甜怪表示滿足！
椰子牛奶白兔布丁。 
字母蛋糕磚。 
滋味蛋形芒果奶凍。 
朱古力杯子蛋糕。 
法式花形千層酥。 
迷你胡蘿蔔。 
榛子朱古力撻。 
任食LINDT軟雪糕。
✦ 鹹點
包括：朱古力雞肉酥、鵝肝朱古力、煙肉栗子蓉朱古力多士、朱古力墨西哥素菜醬、朱古力脆薯片
以Lindt朱古力設計嘅鹹點真係好特別！其中，我最愛朱古力墨西哥素菜醬，味道有少少似肉醬意粉汁，食時有啲紅腰豆及鷹嘴豆，點多士食好有口感。另一款煙肉栗子蓉朱古力多士都好特別，鹹鹹甜甜，香糯得嚟脆脆地。朱古力雞肉酥就正正常常，唔算太特別。
朱古力墨西哥素菜醬。 
煙肉栗子蓉朱古力多士。 
朱古力雞肉酥。 
鵝肝朱古力。
LINDT朱古力下午茶
推廣日期：即日起至5月16日
價錢：HK$388*（一位用），HK$688*（兩位用）
地點：大堂餐廳GREEN
*以上價錢需另收加一服務費
復活節外賣版下午茶 將酒店美點帶回家
想在家中延續節日氣氛？只需港幣688元（二人用），賓客可於酒店網上商店購買LINDT朱古力外賣下午茶，安在家中擁有極致享受！
LINDT朱古力外賣下午茶
推廣日期：即日起至5月13日
領取日期：即日起至5月16日
價錢：HK$688（兩位用）
取貨地點： 唯港薈地下GREEN
節日限定復活節蛋糕
新品復活節主題蛋糕，同下午茶一樣圍繞住兔仔元素，共有2款口味，分別有「復活兔層層疊」及「無粉朱古力復活兔蛋糕」！復活兔層層疊係由3層兔形海綿蛋糕，加上香滑嘅忌廉製成，甜而不膩；「無粉朱古力復活兔蛋糕」則造型可愛 ，朱古力及雜莓夾心，啱晒愛甜嘅朋友，加上可愛造型，大人細路都鍾意！另外，今次系列亦同情人節一樣，加入大量新鮮嘅食用花！亦係Danny向一班90後嘅年輕花農取貨製成，睇得又食得，相當特別呢！
節日限定復活節蛋糕
推廣日期：2021年3月12日至4月2日
領取日期：2021年4月1日至5日
價錢：各HK$488
取貨地點：唯港薈地下GREEN
查詢：https://www.hotel-icon.com/zh-tw/offers/lindt-afternoon-tea
編輯評審
味道：4
環境：4
服務：4
CP值：3.5
（*5為最高分）
