相信好多人都好想返鄉下「日本」，可惜疫情關係，最快似乎都要等到今年第三季啦！有見及此，最近屯門黃金海岸酒店就搜羅日本多個縣嘅優質綠茶，打造咗「綠茶派對」下午茶！不但可比大家用「味」遊日本，品嘗一系列綠茶鹹甜美點，下午茶嘅造型亦相當精美！愛打卡兼日本控嘅朋友一定不可錯過！
內容目錄
綠茶控至愛 日本多縣綠茶打造鹹甜點
「綠茶派對」下午茶精選咗日本多縣嘅綠茶嚟設計點心，當中包括京都綠茶海綿蛋糕、北海道綠茶奶凍、靜岡綠茶鬆餅等等，相信綠茶控一定可得到充分滿足！另外，是次下午茶一貫酒店嘅精致作風，用上大量自家製餐具，睇上去好似食緊三層架版嘅Omakase！照顧晒大家嘅味蕾及視覺享受！
✦ 甜點
包括： 北海道綠茶奶凍配紅豆、京都綠茶白朱古力蘆薈啫喱海綿蛋糕、焗綠茶芝士餅、 迷你蘋果綠茶金寶撻、靜岡綠茶鬆餅配紅豆、綠茶林明頓、日式三色小丸子串配甜醬油
「綠茶派對」下午茶嘅食物份量比想像中多，淨係甜品都有8款！個人最愛北海道綠茶奶凍配紅豆，真係好滑，綠茶奶凍亦濃郁甘香，加上大大粒日本紅豆，好滿足！日式三色小丸子串配甜醬油亦不錯，令小編點憶喺日本街頭食串串嘅感覺，煙煙韌韌加上微鹹嘅醬油，唔錯！京都綠茶白朱古力蘆薈啫喱海綿蛋糕好得意，咬到面層係蘆薈啫喱，爽脆，之後就係香滑嘅綠茶蛋糕，口感豐富！
✦ 鹹點
包括：照燒雞肉菠菜漢堡包配香草醬、綠茶蟹肉醃青瓜撻、吞拿魚他他配香脆紫蘇葉及芥末脆米、綠茶蕎麥麵配天婦羅蝦及水煮鵪鶉蛋、燒紫蘇葉飯糰配蝦籽
好少見到點心會做得咁精巧，無論係天掃羅蝦或吞拿魚他他，都會有塊炸紫蘇葉墊底，成件攞起食晒都無問題！照燒雞肉菠菜漢堡包配香草醬好惹味，我係食完甜食後嘗呢個，有少少wasibi衝擊口腔，感覺幾refresh！綠茶蕎麥麵較淡味，但伴鵪鶉蛋及醬汁食，口感又幾好。
編輯評審
味道：4
環境：4
服務：4.5
CP值：3.5
（*5為最高分）
【詳情】
「綠茶派對」下午茶
供應日期：即日至3月31日（堂食）
價格：HK$428（2人）
地址：屯門香港青山公路1號香港黃金海岸酒店低層地下
預訂：2452 8833 或瀏覽www.sino-hotels.com
* 另收取加一服務費
