Last Updated on 12/03/2021 by FLOWSPACE.HK
去年12月2日新開嘅歷山酒店，以華麗嘅維多利亞式宮澱設計見稱。可惜全城期待嘅自助餐，卻在開業數天已被負評洗版，當時酒店就承諾改善質素。有見及此，經過3個月時間，小編今次就決定親身試「伏」，睇睇食物及服務質素係咪真係好咗先！
內容目錄
指控一：食客排長龍？
曾有Youtuber表示歷山酒店嘅自助餐，部分食物，如生蠔、燒西冷均要排隊先攞到，有的更等超過9個字！今次小編嚟到，全場坐滿人，但都不見有排長龍嘅情況！連最受歡迎嘅生蠔Bar都等咗5分鐘左右就攞到2隻生蠔，取食物過程好流暢呢！
指控二：甚少補充食物？
早前有唔少網民影到自助餐嘅吉盤，指控自助餐絕少補充食物。今次小編嚟到，又唔覺有任何吉盤形象，大部分食物喺得返1/3時，職員已refill。
指控三：不夠專業處理生蠔？
有網民指酒店之前洗生蠔好唔專業，只用雪糕桶裡不足1加侖嘅水，洗超過50隻生蠔。今次小編都特地留意下洗蠔師傅，見佢全程用大量過濾水沖洗生蠔，已不見「浸」洗現象。生蠔到手，幾乾淨無沙或污水，衛生方面已合格有餘！
指控四：超長枱布 污穢兼易揢親？
之前有網民指歷山餐廳內嘅枱布超長，好易踏到，唔止易揢親，個個行過都踏2腳，感覺一撻撻好污穢。今次小編嚟到，見到所有枱布無晒，大家直接喺雪石枱食飯，呢個問題已迎刃而解。
指控五：食物質素不佳？
今次小編覺得整體質素都唔錯，並無網民講食物放好耐、超瘦海鮮或風乾三文魚之類嘅現象。個刺身Bar值得一讚，刺身厚肉多款式、羊架及西冷都無根，啖啖肉、甜品則有超過30款蛋糕及雪糕，選擇都幾多！唯獨係喇沙湯麵仍然如網民所指，睇落濃味，實際淡到滾水咁，呢方面倒仍有進步空間。
總結:
雖然人人話伏，但小編又覺得整體好正！畢竟歷山酒店去年12月先開，已經Keep住密密改善，以現時水平，個人覺得絕對值得大家再比多次機會！
【詳情】
歷山餐廳 假日Brunch自助餐（星期六、日及公眾假期）
價格：成人HK$407*／位、兒童HK$196*／位（折扣價）
地址：北角城市花園道32號歷山酒店大堂樓層
自助餐網上預訂優惠：http://bit.ly/3kcHDqi
