雖然小編無去過摩洛哥及土耳其，但自細就受《一千零一夜》故事薰陶，對呢類神秘又繽紛嘅國度零抗拒力！如果大家與我一樣，鍾意華麗嘅中東風情，一定要嚟上環11月新開cafe NACASA Café & Bar！呢度有著摩洛哥舍夫沙萬嘅寶藍色格局、土耳其嘅彩色玻璃吊燈及民族地氈，洋溢濃濃嘅異國風味！另外，店家仲提供一系列咖啡及輕食，好適合姊妹們嚟打卡下午茶兼Chill下！
內容目錄
nacasa cafe異國旅遊 啟發設計靈感
據店員所指，原來店主熱愛旅行，喺旅行期間，愛上摩洛哥及土耳其嘅華麗風格！所以係設計Cafe時，就想將當地元素帶嚟店中。一入門口，即有種去咗摩洛哥舍夫沙萬嘅感覺，由門口嘅梯式置物櫃，圖騰瓷磚牆，以至於繽紛嘅花卉盆栽，環境勁開揚及舒服；上到二樓，則好似去咗土耳其，牆身掛滿又紅又花嘅中東式地毯，雕花木門及彩色玻璃吊燈等，雖然日光較少，但華麗感十足！
高質咖啡 自家制小食
✦ Honey Cake HK$42
質地有啲似木槺蛋糕，粉粉地但好香濃。我鍾意佢哋蛋糕有好陣好濃嘅蜜糖香，不過對我嚟講有啲甜。
✦ Piccolo Latte HK$36
小杯版latte，啱晒我呢啲長時間失眠人士，可以貪心飲少少。店家嘅latte偏Nutty啲，豆香濃重，味道不錯。
✦ Caramel Caffe Latte HK$52
朋友係甜怪，所以都揀咗最甜嘅latte！ 😂
佢表示鍾意呢款啡好順喉，焦糖幾香濃，Expresso量不多，唔慣飲咖啡嘅人應該會好易接受。
編輯評審
味道：3.5
環境：4
服務：4.5
CP值：4
（*5為最高分）
【詳情】
NACASA Café & Bar
地址：上環華里5號地鋪
IG：@nacasa_hk
