【2021】銅鑼灣1月新店 | 日本過江龍Saori 1mm和栗紗織班戟登陸銅鑼灣

過往去京都旅行，必會去食名物「和栗紗織班戟」！雖然每日得40個名額，排隊都排到暈，但當食到香糯濃郁嘅栗蓉紗織蛋糕，就咩辛苦都值得！最近得知銅鑼灣開咗首家紗織班戟專門店”Pancake Senmon Saori”，身為甜怪當然立即飛去試紗織蛋糕啦！銅鑼灣美食gogogo~

襌意裝潢 京都秋季楓情

首先講講環境，我就勁鍾意呢度充滿襌意嘅裝潢，素雅嘅深棕色家具、木趟門、枯山水小庭園、象徵栗子成熟嘅秋楓裝置，每個細節都洋溢古撲嘅京都風情！​

口感豐富 1ｍｍ粗紗織班戟

食物方面，”Pancake Senmon Saori”主要提供三款口味嘅紗織班戟，包括和栗、紫薯及甜薯，亦有一系列嘅招牌戚風蛋糕。飲品方面就以啡茶為主，較為簡單。​

​由於仍屬試業階級，暫時小編只係試到甜薯紗織班戟（有點可惜！下次我一定要再幫襯，試和栗！）及抹茶Pancake，整體味道同日本試到嘅無異，真係好驚喜好滿足！茶飲就正常發揮，各式茶具及杯子都好精緻，超igable！試業關係，略嫌出菜速度有啲慢，上齊菜要近一小時，不過為咗食好西，會有無限耐力（笑）！

✦ 甜薯紗織 HK$148​
每份紗織蛋糕大概有一卷紙巾咁大，份量都幾大！面層舖滿細長嘅甜薯蓉，睇上好似炒麵（笑）！中層則係日本厚忌廉及蛋白餅，底層則是班戟！食上口，先會嘗到入口即融、濃郁香甜嘅蕃薯蓉，之後就係脆脆地嘅碎蛋白餅，質感有趣，最後則係鬆軟嘅班戟，整體味道唔會好甜，又口感豐富，非常高質！​

✦ 抹茶蕨餅班戟 HK$138​
一份班戟，有2個抹茶雪糕、1個雲尼拿雪糕，邊點雪糕邊食鬆餅，加埋煙韌嘅蕨餅，幾正！​
​

✦ 焙茶（熱） HK$48​
幾濃茶香，甘香，口感柔潤。​

✦ 黑豆茶（凍）HK$42​
冰鎮關係，豆香味唔出，不過凍茶飲上口好爽，送蛋糕不錯。

編輯評審

味道：4

環境：4

服務：4

CP值：3.5

（*5為最高分）

【詳情】

Pancake Senmon Saori​

地址：銅鑼灣百德新街57號海華大廈地下B號舖​

FB：＠SaoriPancake ｜ IG：@saori.pancake