【2023】月山 Gassan | 精緻午市Omakase 絕美和式風雅頌

by chuchucheung

上次小編去完日山,一直對佢哋嘅壽喜燒念念不忘!可以喺香港食到咁正宗嘅壽喜燒,望住維多利亞港食頂級和牛,感覺真係好Chill好幸福! ​
最近,小編發現日山原來開咗姊姊店——「月山Gassan」!同日山唔同,月山主打Omakase及會席料理,將日本飲食「不時不吃」嘅宗旨發揮得更淋漓盡致!此外,店內承傳咗日山嘅庭園風設計,signeture嘅竹林棧道、復古舟屋、竹簾座椅、飛龍浮世繪,儼如演出一首和風頌詩。​

舟屋 竹林 禪系日式庭園設計

月山最大特色係餐廳中央有座大型屋形船,原來係享用廚師發辦嘅地方。客人可在舟屋中,欣賞師傅嘅即席揮毫,同時嘗至鮮時令菜。

誠意十足午市​廚師發辦

由於無咗晚市,今次我就約朋友去食午市Omakase!對月山Gassan第一印象就係店員好有禮貌,悉心安排我哋坐舟屋,師傅又會細心解說食材嘅故事及製作手法,好有賓至如歸嘅感覺。​
至於午市Omakase,比我感覺都好豐富!唔會清一式壽司,亦唔會用大量白身魚為主、刻意禁低成本!HK$880嘅套餐中,有前菜、2款刺身、10款壽司、2款配菜、熱食、湯,以及甜品等等,真心勁足料,精采程度唔會遜於晚市呢!

✦ 月山午市Omakase HK$880
(由於係Omakase,同一份套餐,食材組合會略有不同。)

✦ 前菜​

包括:松葉蟹茶碗蒸、慢煮北海道安康魚肝​
茶碗蒸,蛋非常滑嫩,蟹肉鮮甜。原片厚切北海道安康魚肝!師傅細心挑走血管、血絲,完全無腥味,仲附有黑胡椒鹽及鮮芥辣,突顯魚肝嘅肥美油脂。

✦ 刺身​

包括:真鯛魚、煙燻鰹魚​
真鯛魚拌芽蔥、柚子jelly及紫蘇花等配菜食用,酸甜醒胃。煙燻鰹魚則用了蘋果木燻製,加咗炸京蔥絲、土佐醋及蕃茄莎莎,和洋Fusion元素,多重口感,幾正。​

✦ 壽司​

包括:針魚壽司、左口魚壽司、池魚壽司、梭子魚壽司、甜蝦壽司、深海池魚壽司、中拖羅壽司、沙甸魚卷、醬漬赤身壽司、北海道馬糞海膽壽司​

月山嘅壽司不會好多飯,唔會食兩舊就有被打爆嘅感覺!其中,我最鍾意就係中拖羅壽司!油脂均勻,爽甜彈牙,仲有京蔥點綴,食完滿滿幸福感!另外,沙甸魚卷更係視覺與味覺兼備!師傅細心為沙甸魚去骨,加入黃瓜、芋莖、薑蓉、芽蔥及Wasabi製成卷,切出嚟嘅卷顏色繽紛、精緻,食上口油脂豐富,令人難忘!

✦ 配菜​

包括:慢煮八爪魚、魚蓉蛋糕​
用咗甜豉油慢煮石爪八爪魚,肉質實正、Q彈,海水味濃。魚蓉蛋糕用上多種蝦及魚打成蓉製作,加上淮山、醬油及味醂製作,口感海錦蛋糕及梳乎里Pancake之間,非常獨特!​

✦ 熱食​

金鯛魚立鱗燒

今次熱食係金鯛魚立鱗燒,用滾油爆馬狗魚皮,再炭火慢燒,點上海瞻醬油,成件事好鮮甜!​

✦ 湯​

九州地雞湯

食完晒主食,最後一度係湯物「九州地雞湯」,味道清甜,有足料舞茸菇,好暖胃!​

✦ 甜品

北海道赤肉蜜瓜、柚子忌廉泡芙​
北海道赤肉蜜瓜、柚子忌廉泡芙​

包括:北海道赤肉蜜瓜、柚子忌廉泡芙​
甜品有兩樣,北海道赤肉蜜瓜唔洗講,鮮甜多汁,好正!柚子忌廉泡芙則偏酸,入口即化,解膩一流。

備註:舟屋牆身係一幅飛龍浮世繪,上面隱藏咗一隻多拉A夢頭!😂師傅話搵到可以免費送一件壽司,我就成功搵到啦!有機會大家都挑戰下眼力!​

【詳情】

月山 Gassan
查詢及訂座:3499 1427
地址:中環皇后大道中80號 H Queen’s19樓​​​
IG:@gassanhk Facebook:@gassanhk

Leave a Comment

Related Posts 相關資訊