意大利菜花款多變，如嫌精細嘅星級fine dining太離地，想同大班朋友開心share，試下地道家庭式料，個人覺得海港城新開嘅”Da Filippo Trattoria” 係個唔錯選擇。最近餐廳更推出全新意式下午茶 Da Dolomites，以多洛米提名勝嘅奇峰怪岩為靈感，打造6款色彩豐富嘅鹹甜點心，無論賣相及味道都無得輸！
內容目錄
米芝蓮一星餐廳主廚主題 意式家庭式餐點
主廚Andrea Alimenti生於佛羅倫斯，自1997年起，其餐廳品牌Acquamatta就連續13年榮獲米芝蓮一星殊榮，非常有名！據說佢嚟到香港，發覺香港唔易搵到好傳統嘅意大利家庭料理，所以把心一橫，以此為題開設餐廳。
雖說走親民路線，但無論食材或烹調手法，都嚴格遵循傳統，好似用自家培植酸麵種 (sourdough) 製作嘅手工Pizza、自家製意大利麵、風乾熟成一年嘅Acquarello米製作燉飯等，每一項都係心機嘢，味道自然無得輸。
意大利名勝取經 層次豐富 色彩繽紛
“Da Dolomites” （多洛米提）意式下午茶，靈感來自意大利阿爾卑斯山脈名勝Da Dolomites，廚師以當地嘅奇峰怪岩為靈感，打造6款色彩豐富嘅鹹甜點心。
✦ 意式下午茶 Da Dolomites HK$328（2位）
✦ 甜點
提拉米提山 
意式鮮果撻 
朱古力曲奇餅 
意式鮮果撻
甜點有提拉米提山、朱古力曲奇餅及意式鮮果撻； 鹹點有香辣波士頓龍蝦法式多士、煙三文魚牛油果酥餅及意大利風乾火腿青醬配水牛芝士。其中，小編最愛意式鮮果撻，以雲呢拿吉士醬配士多啤梨及黑莓作配搭，並以薄脆片作裝飾，又精緻又好味！
✦ 鹹點
意大利風乾火腿青醬配水牛芝士 
煙三文魚牛油果酥餅 
香辣波士頓龍蝦法式多士
鹹點方面，有香辣波士頓龍蝦法式多士、煙三文魚牛油果酥餅及意大利風乾火腿青醬配水牛芝士。龍蝦法式多士鮮味十足，味道OK！煙三文魚牛油果酥餅，將煙三文魚卷成花狀，寓意Da Dolomites漫山遍地嘅野花，食上口肥美啖啖肉，口感唔錯；風乾火腿青醬配水牛芝士就香口，佐酒一流。
同場加映 親民意大利菜
✦ 巴馬火腿佛卡夏 HK$178（加HK$30轉心形批）
據說心形批係情人節限定，但後來太受歡迎，所以成為固定菜單選項！😂
巴馬火腿佛卡夏係意大利最普遍嘅家庭料理，呢度用上莫扎瑞拉芝士、火箭菜、巴馬火腿和車厘茄製成，材料新鮮，基本上都無伏！個人覺得佢哋嘅餅底真係好正，又薄又香口，唔似出面咁好膩，食兩件就滯。
✦ 紅蝦他他魚子醬墨汁意粉 HK$328
呢個真係十級推薦嘅意粉！我嘅至愛！鮮嫩嘅生紅蝦肉，加入矜貴魚子醬，配上墨魚汁意粉，鮮甜美味！店家自製嘅意粉都份外彈牙，成件事都好完美！
✦ 意式冰糕 HK$68
好鍾意意大利嘅Gelato或冰糕，都係食完唔覺有負擔嘅好東西！店家呢款冰糕都做得出色，食上口係半冷凍mousses和雪糕嘅合成品，第一下咬會硬硬地，但隨即冰糕化開，係軟棉香滑嘅奶香，好正！
✦ 千層堤拉米蘇杯 HK$68
呢款千層terimisu勁大杯，我同朋友都食唔晒！😂我鍾意佢唔會好重蘭姆酒味，咖啡、起司、蛋黃、可可粉，層層交疊，口感夠豐富！味道唔錯！
✦ 抹茶鮮奶 HK$46
簡單嘢，呢度都做得好好。呢杯熱飲嘅抹茶粉品質幾好，幾甘香撲鼻，鮮奶又夠幼滑，飯後飲一杯暖胃，感覺唔錯。
編輯評審
味道：4
環境：4
服務：4
CP值：3.5
（*5為最高分）
【詳情】
Da Filippo Trattoria
地址：尖沙咀廣東道21號海港城港威商場3樓3203-3204A號舖
IG：@dafilippo.hk | FB：@dafilippo.hk
