泰國雖剛開關，但短時間似乎都未能去到。 如果大家都同小編一樣，經常「泰」心癢，不如去下特色嘅泰國菜館，食住止癮先！尖沙咀近來開咗間特色嘅泰式Fusion餐廳”Asok Thai Garden” ，將傳統泰菜元素融入西餐，加上以泰國天然材質打造花園度假場景，無論係食物質素或環境都令人滿意！
內容目錄
天然材質打造 洋溢清涼度假感
Asok Thai Garden以泰國標誌性嘅輕質天然物料打造，好似竹子及實木家具、藤織吊燈、竹簾窗、木牆、乾花及熱帶植物等，加上沙灘太陽傘，予人舒適及涼爽嘅感覺，度假感出晒嚟！
性價比高 泰西Fusion料理
食物方面，Asok Thai Garden主打泰西Fusion料理，好似午餐menu咁，將泰國經典嘅料理，冬陰公、紅咖哩軟殼蟹或香辣肉碎等，加入意粉或Rissotto，拼湊出別樹一格嘅口味！
此外，坐晏咗，仲可以叫杯泰式Cocktail，揀冬陰公薯條、串燒菠蘿等小食，同朋友enjoy happy hour！小食價錢都係HK$58-78左右，happy hour凡惠顧2杯Cocktail或以上仲有8折，真心CP值高！
✦ 冬陰公大頭蝦意粉 HK$108
呢款意粉真心有驚喜！真係用咗泰國直送嘅巨型大頭蝦，淨係蝦頭都差唔多有我拳頭咁大，入面有濃郁蝦膏，刮出嚟食，啖啖咸香鮮美，好正！意粉伴有冬陰公炒，幾惹味，好鍾意入面仲有勁多秀珍菇，正！
大頭蝦超多膏！ 
啖啖蝦肉，爽口彈牙！
✦ 香茅燒豬頸肉飯 HK$98
相比起大頭蝦意粉，豬頸肉飯就無咁驚喜，但味道還是不錯。豬頸肉有碳燒香，爽口彈牙，又有蝦片及甜酸汁，組合簡單好味。
✦ 豬肉串燒＋燒菠蘿 HK$78
Happy Hour限定小食，碳燒豬肉惹味，外層微微脆口，連菠蘿咁齊食，酸甜清新。
✦ 泰式奶茶慕絲 HK$25（是日甜品，跟餐加配價）
由泰式奶茶做嘅慕絲凍，好嫩滑，香濃甜蜜，拌有藍莓及士多啤梨雜果，食完都唔覺得膩。
✦ 泰式樽仔奶茶、泰式樽仔綠奶茶 各HK$15（跟餐加配價）
Asok Thai Garden都有近來大熱嘅泰式樽仔奶茶！跟餐都係加HK$15，CP值幾高！仲分別有經典及綠奶茶2款口味！經典就正常味，濃淡適中，綠奶茶則同泰式奶茶相似，一加入淡奶、煉奶及砂糖，分別在於阿薩姆茶換成抹茶。我覺得比平時飲開嘅Matcha latte濃郁好多，奶味及甜度更高，加了冰塊飲，感覺都幾好，值得一試。
✦ Kanchanaburi HK$98
呢度嘅Coctail以泰國地方來命名！Kanchanaburi出名山脈多、野生動物保護區多，所以Cocktail 用了綠色做主調，Gin酒加上Thai Basil、Syrup、Lime Juice及Tonic Water，飲上口清爽，香茅及薄荷味濃。
✦ Chiang Mai HK$128
Chiang Mai古城繽紛典雅，店家用咗玫瑰紅為主題去炮製呢款Coctail，入面加咗Gin、Rose Tea、Lime Juice、Lychee及Mint，用銀器裝住，好igable！口味比較爽甜清新，感覺特別啱女仔飲呢！
【詳情】
Asok Thai Garden
地址：尖沙咀亞士厘道37號地舖
營業時間：11:30am-10:30pm
IG： @asokthai_garden
