趁住周末好天氣，又係出動試新Cafe！最近小編就去咗灣仔皇后大道東嘅新Cafe “Bow Coffee” ！呢度以藍為主調，型格又舒適，加上濃濃咖啡香，難怪開業不久，即見人頭湧湧。老闆本業做保險，喺2018開設咗香港第一間虛擬保險公司”Bowtie HK”，由於常要與客人見面，又發覺香港缺乏適合聊天嘅地方，於是就決定喺公司樓下開設Cafe，亦即係而家試業中嘅”Bow Coffee” ！旨在為大家提供一個休憩處，為忙碌嘅都市生活打打氣。
內容目錄
為城市人而設 有營又有益
由於從事保險，強項係醫療保，所以店子都好Care大家嘅健康，提供嘅食物都走健康有營路線。好似”Bow Coffee”signature嘅”Smoked Salmon Toast” 及”Live & Breathe”，均係高纖低卡之選！
✦ Smoked Salmon Toast HK$65
呢Toast份量都幾大，上面有5個煙三文魚肉卷及食用花，下層則係cream cheese、橄欖油及酸種包，配搭味道唔錯，有營又igable！作為早餐或Tea就啱晒！
✦ Live & Breathe HK$48
自家製西柚汁，再加梳打及expresso，簡單嚟講就係西柚味嘅咖啡Toner！但比一般coffee toner多咗重西柚嘅酸甜口感，味道層次豐富啲！另外，小編幾鍾意店家調製嘅expresso，據店員指，佢哋喺用咗5款咖啡豆混合，喺酸度及豆香味會平均啲，即便飲唔慣咖啡嘅人都可輕鬆駕馭。
至於外形上，特飲嘅粉紅及啡色嘅漸層亦非常igable，愛打卡嘅女生一定不可錯過！
幾何圖案 營造舒適空間
店子裝潢用上大量幾何元素。 
咖啡師都非常年輕，設計出一系列新穎口味飲品。 
店子非常開揚，可邊品啡邊賞街景。 
藍、白及啡，店面簡約又型格。 
Bow Coffee店如其名，以Bowtie為Logo。 
店內有唔少綠葉盆栽。
小編亦好愛”Bow Coffee”嘅裝潢，主調以藍、白及啡為主，用色簡潔，但設計師使用大量幾何元素，令到整體環境好有空間感。另外，店家亦設有大量長方形大窗，採光十足，令人舒適。
編輯評審
味道：4
環境：3.5
服務：4
CP值：3.5
（*5為最高分）
【詳情】
Bow Coffee
地址：灣仔皇后大道東58-64號地舖
