荃灣美食多，Cafe卻不如深水埗或港島般遍地開花。如果你都認同荃灣係Cafe沙漠，相信一定會改觀！最近，大霸街開設咗全新嘅”HIKARI“咖啡店，店名喺日文中解作「光」，確係喺茶記林立嘅大壩街中鶴立雞群，份外有文青氣質。此外，咖啡店裝潢仲大走日式簡約路線，設有一系列自由配搭Sourdough及靚靚拉花飲品，無論係環境還是食物都非常高質！
內容目錄
特高樓底 簡約無印風
咖啡店裝潢大走日式簡約路線，淺色木框配象牙白牆，門前大玻璃窗邊位透入自然光，和”HIKARI”日文ひかり「光」相輝映，予人舒適感覺。另外，沿樓梯直上閣樓，仲設有數個座位，此處光線較為昏暗，備有大量植物，同樣係打卡好去處！
必飲拉花拿鐵 自選Sourdough
HIKARI食物走輕盈健康路線，由主食、輕食、以至甜品，都以高纖高蛋白和低卡為主。至於食品款式，以Cafe嚟講都算多選擇，好似自由配搭嘅Sourdough，淨係Sourdough及醬料就有2款選擇，配料則有14款可揀，唔怕有嘢唔啱食。主食都有多款意大利飯同意粉，其中，必食嘅煙三文魚青醬意粉，青醬汁都係店家自製，份外香濃，面頭仲撒咗香料同松子，口感豐富！至於飲品，必試一系列拉花拿鐵！咖啡師巧手拉出天馬、松鼠、海馬、玫瑰、天使…等圖案，超igable！
✦ 4款配料自選酸種吐司 HK$88
小編最喜歡自選酸種吐司，可以按個人喜好，自選2-4款配料，好似今次我揀班尼迪蛋（另加HK$8）、黑松露炒滑蛋（另加HK$8）、牛油果、雜菌，份量都幾大，計埋都係一百蚊鬆啲，以Cafe計唔貴呢！
✦ 黑松露意大利飯 日式溫泉蛋‧芝士脆片 HK$88
有別於一般risotto，呢度食到嘅版本較乾身少少。有大量黑松露，好香好Creamy！配料則有溫泉蛋、菇菌、洋蔥，仲插上烤得香脆既芝士脆片及巴馬火腿片，口感非常豐富。
✦ 煙三文魚青醬意粉 HK$138
對比下，煙三文魚青醬意粉會較低驚喜度，略嫌青醬唔夠濃郁，意粉有點乾身。不過，煙三文魚都幾多，整體食完都幾飽肚。
✦ 慢煮雞胸青蘋果沙律 HK$78
雞胸肉好嫩滑，沙律又有蘋果、雜菜、松子及沙律醬，好多配料。
✦ 髒髒提拉米蘇 HK$68
Tiramisu入口細滑濕潤，咖啡味夠香濃，仲好似落左啲冧酒，加上朱古力威化餅，正常配置，但非常好食！
✦ 鮮奶焙茶 HK$42；鮮奶抹茶 HK$42
拉花拿鐵非常出色，花紋精緻，如天馬拉花號翅膀，連羽毛紋細節都有，靚到唔捨得飲！此外，拿鐵亦唔係得個款，整體味道濃郁香滑，不錯！
編輯評審
味道：4
環境：3.5
服務：4.5
CP值：3.5
（*5為最高分）
【詳情】
HIKARI
營業時間：11am –10pm
地址：荃灣大壩街21號地舖
IG：@hikari__coffee
