【2023】一瀧 Ichitaki | 銅鑼灣 全新江戶前料亭 福岡鄉土料理

by chuchucheung

近來港島區真係開咗好多高質日本餐廳!好似有「日本美食街」之稱嘅登龍街,又有重磅新貴!那就是主打福岡料理嘅江戶前主題料亭「一瀧 Ichitaki」!​由2位福岡師傅坐鎮,還原一系列福岡傳統鄉土料理,好似牛腸鍋、棉花糖壽喜燒、鰻魚飯、一夜干三瀨雞、墨汁唐揚雞、燒鳥……等,原汁原味,菜式多樣,真係日本菜控嘅天堂!​

「一瀧 Ichitaki」可以喺包廂中享受傳統日本料理,連建築、庭園、氣氛都係用餐嘅一環!

江戶前料亭 藏造町老街

小編好鍾意一瀧Ichitaki嘅裝潢,採用咗古色古香嘅江戶前風格,木色主調下,有著土藏造町家棧道、障子門、江戶手描提燈、石燈籠、浮世繪等裝置,庭園景觀配合懷舊裝修設計,唔講仲以為自己返咗鄉下!​

✦ 棉花糖A4宮崎和牛壽喜燒 HK$488​

壽喜燒相信大家食得多,但以棉花糖形式,將糖份融於湯汁,你又試過未?店員表示,原來呢種食法,近來係日本都挺流行!落棉花糖前嘗嘗湯汁,到落完棉花糖,湯底果然甜了不少!感覺好過癮!
另外,抵讚位係用嘅A4宮崎和牛真心高質,大塊且油花分布均勻,輕灼約10秒即食得!香甜彈牙,肉味濃郁,咩都唔洗落,正呀!鍋中仲有好多日本蔬菜, 蘑菇、鴻喜菇、洋蔥、白菜、豆腐、京蔥及麵條…兩個人share都幾夠食!​

✦ 博多牛腸鍋 HK$228

福岡名物,湯底清甜,微辣,幾惹味!呢度用咗澳洲牛腸,肥美肉香,拌酒100分!不過,多食幾舊會覺得有啲膩,喜不喜歡就見仁見智。​

✦ 日本海膽配火炙A4宮崎和牛壽司 HK$188​

師傅先將A4宮崎和牛輕炙,再內卷米飯、舖上海膽!睇上去鮮色鮮艷,食落則有火炙香口,感受到師傅喺細節上相當用心。至於味道,只能夠話食材先決,料靚自然好味!​

✦ 鰻魚鵝肝墨汁卷 HK$188​

店內挺多博多香口小食,如呢款墨汁卷!入面夾有厚厚嘅鵝肝及牛油果,上面有脆口蒲燒鰻魚,成件事香口十足!​

✦ 三瀨雞全翼一夜干 HK$78​

博多挺出名嘅三瀨雞,師傅先將雞吊起一晚,讓雞肉水份散失,雞皮自然呈現細薄、香脆嘅質感!之後再輕烤即可!個人鍾意佢唔油膩,無炸都到脆薄雞皮!雖然略嫌雞肉乾咗少少,但整體都唔錯!

✦ 一瀧唐揚炸三瀨雞 HK$78​

黑色唐揚雞真係好少見!師傅喺表面加咗墨汁,外表雖然怪怪的,但喺入面釀有芝士!充滿誠意!食時外皮香脆,雞肉Juicy,再配以自家製沙律醬,好味!​

✦ 月見免治三瀨雞肉棒 HK$48​

呢度嘅免治雞肉棒都係師傅親自製作,雞肉比較鮮甜,帶點彈牙口感,幾得意!個人仲好鍾意個蛋皇醬,令雞肉棒有層黏糯質感!​

✦ Bubble Ice Tea HK$88​

全晚比較令我意外係呢款Bubble Ice Tea!據說入面用嘅水果,會按時令變更,無固定配方!今次我就係桃茶,再加青森蘋果汁及荔枝蓉,成杯無加糖都夠甜!勁正!​
呢款特飲會加上酸味煙,據說隻煙都會定時換味,今次我係Citrus,好清爽!​

【詳情】

一瀧 Ichitaki
查詢及訂座:6633 3116
地址:銅鑼灣登龍街1號金朝陽中心2期Midtown 8樓
IG:@ichitaki_hk Facebook:@ichitaki_hk

Leave a Comment

Related Posts 相關資訊