K11 Musea近來愈來愈多特色餐廳進駐，近日就迎來新貴”G Room” ！主打新派西班牙菜，再融入亞洲美食元素，地中海菜與東南亞滋味碰撞，為味蕾帶來全新體驗！此外，店子嘅裝潢都別具特色，360ᐤ圓弧型嘅餐廳牆身，均設置超高清屏幕，隨著音樂變化，屏幕仲會顯現不同場景，如香港夜景、各歐洲著名景點、森林、海洋、花海……一頓飯時間，即帶人穿梭不同地方，滿滿嘅視覺享受！
內容目錄
360ᐤ 超高清屏幕 將藝術與科技融入餐飲
G Room最大特色係將藝術與科技融入餐飲！圓弧型格局，牆身均設置咗360ᐤ 超高清屏幕，伴隨音樂起動，會轉換多款定制動態影像，畫面細膩逼真，令人有猶如身臨其境嘅感覺！其中，小編最愛自然系主題，如海洋主題、寧靜森林、海濱日落，有種令人遠離煩囂嘅感覺！香港維多利亞港景都唔錯，可以以俯視角度，多角度欣賞東方之珠之美，非常獨特！此外，亦有一系列歐洲各熱門景點場景，比我感覺好似置身威尼斯河畔、意大利海島嘅感覺，止旅遊癮無難度！
魚群在屏幕中穿梭，猶如置身水族館！ 
森林與瀑布，靈氣十足！ 
海龜暢泳，令人精神放鬆。 
意大利海島，似唔似去咗旅行？
地中海菜色為範本 注入東南亞風味
至於餐飲，G Room則以地中海菜色為範本，再加入東南亞風味，集百家之長，為味蕾帶來全新體驗。地中海料理出名多海鮮，其中西班牙嘅Paella更係其中佼佼者！G Room版本係用咗原隻波士頓龍蝦，要配焦香亞洲風味炒飯及風乾黑毛豬火腿打造，口感更香口鮮味！另一款日本鮑魚海膽炒意粉，融滙咗歐陸及亞洲風味，採用日本空運鮮鮑魚和海膽，再加入橄欖油、大蒜和少許紫蘇葉，鮮味十足。黑松露伊比利亞火腿配63°C日本溫泉蛋 就採用經36個月天然風乾製成嘅黑毛豬火腿，令鹹香味徘徊於口腔之間，齒頰留香，回味無窮。
✦ 原隻龍蝦海鮮焗飯 HK$598
不同一般Paella，G Room嘅做法係用咗中式炒飯底，飯粒吸收晒海鮮汁，好鮮味！無傳統Paella咁油膩，呢款嘅飯較乾身，飯中間仲夾雜咗風乾黑毛豬火腿及魷魚圈，幾有咬口。另外，飯上有原隻波士頓龍蝦，廚師好細心將蟹件都敲碎晒，基本唔洗用手剝殼，就可輕鬆食晒成隻龍蝦。至於龍蝦，經過焗製仍保留到啖淡肉汁，食上口唔錯。
龍蝦均拆好晒殼。 
全隻波士頓龍蝦喺飯面，打卡100分！
✦ 日本鮑魚海膽炒意粉 HK$318
海瞻好新鮮，質地乾身，唔會黏膩，食上口超鮮甜，非常高質！烤鮑魚正常發揮，意粉加咗紅椒及蒜片炒，幾香口。
✦ 36個月伊比利亞火腿蕃茄配西班牙水晶麵包 HK$138
講到西班牙Ham，實係伊比利亞豬最正！仲配西班牙傳統水晶包，超酥脆、香口，加上蕃茄鯷魚、以及鯛魚片刺身，口感份外豐富！
✦ 黑松露配伊比利亞63度日本溫泉蛋 HK$128
煙肉烤得乾身香脆，配上溫泉蛋、雜菌、香草及胡椒，成件事都好香口。菜式上仲有即刨黑松露片，非常清香，鮮味，層次感十足。
✦ 油泡蒜香鮮蝦 HK$128
呢款小食先用蒜片將大蝦爆香，再油泡浸熟，好香好惹味！西班牙菜最靈魂係橄欖油，呢款加蒜片，佐酒一流！
✦ 西班牙水果紅酒 HK$118
以香醇嘅西班牙紅白酒、麝香葡萄甜酒及冧酒混合新鮮時令水果，水果嘅酸甜香氣，帶出紅白酒豐盈嘅韻味，非常易入口，唔係飲開酒嘅人都輕鬆駕馭。
✦ Wasagin HK$148
呢款雞尾酒用柿子酒浸泡而成，口感偏甜，加入青瓜及Wasabi調味，清新得嚟好刺激！配濃味菜餚最啱！
編輯評審
味道：4.5
環境：4
服務：4
CP值：3
（*5為最高分）
【詳情】
G Room Bar & Lounge
營業時間：1130am –10pm
地址：尖沙咀梳士巴利道18號Victoria Dockside K11 Musea 5樓504號舖
IG：@g.room.hk
