近來山林道開咗好多新餐廳！基本上，小編每星期去都有新驚喜，而「基地 Base Bar & Restaurant」就係我最近去過、印象幾難忘嘅一間。裝修充滿宇宙元素，食物就以西餐輕食為主，加上現場勁歌音樂，成件事都好爽！相信遲啲開設夜市，收工約友人嚟呢度Chill下，不失為一個理想選擇！
內容目錄
宇宙基地 神秘外太空元素
首先講下個裝修先，整間店無論裡裡外外都滿布幻彩霓虹燈，主題圍繞宇宙、太空船及隧道等，加上昏暗嘅現場環境，真係有種置身外星基地嘅感覺！好型！
高質西餐 精品cocktail
食物方面，主要提供西餐為主，好似牛扒、意粉、Pizza或Burger之類，仲有一系列精緻cocktail～好啱收工時，嚟呢度Chill Chill～
✦ 煙燻油甘魚 HK$88
我去餐廳逢親見到煙燻嘢，基本上都會叫！太鍾意食物上滲透碳木香啦！今次亦不例外！我點咗煙燻油甘魚！呢款油甘魚真係正！新鮮魚片加咗柚子汁，勁鮮甜！魚肉仲散發陣陣蘋果木香，無論味蕾或鼻蕾都雙重享受！
✦ 焗芝士蟹肉酥皮紙卷 HK$88
隻酥皮紙有鞋硬，麻麻地。不過入面幾足料嘅，滿滿嘅芝士蟹肉及菠菜，幾香濃，食完飽咗一半。
✦ 烤龍蝦肉漢堡 HK$100
坦白說呢個龍蝦Burger真係一般般，龍蝦肉有啲鞋，無咩蝦肉味。不過一個Burger有兩大片龍蝦肉，以呢個價錢嚟講，其實無位好投訴。
✦ 安格斯漢堡 HK$100
對比龍蝦Burger，還是經典嘅安格斯Burger好！呢度出嘅安格斯牛漢堡好厚，目測平均有1cm厚！啖啖肉，幾過癮！
✦ 基地披薩（水牛芝士＋雞肉＋火箭菜） HK$120
披薩意外地好味！個餅底脆薄到好似餅乾，好香口！拉起Pizza，層拉絲幾澎湃下，食上口，芝士香係口中爆發，加埋雞肉及火箭菜，成件事幾惹味。
✦ 西班牙紅蝦扁意粉 HK$188
扁意粉掛汁頗多，食時伴隨濃郁蝦汁，味道不錯。大蝦味道正常，蝦頭好多膏，正！🤪
✦ Red Lip HK$88
呢款特飲係店家signature, 我覺得隻味有fruit punch，飲上口幾爽，士多啤梨及橙味幾濃。
✦ Refresher HK$88
表層有蛋白泡，底層就有菠蘿汁，呢款特飲綿滑得嚟幾清新。
編輯評審
味道：4
環境：4
服務：4
CP值：3.5
（*5為最高分）
【詳情】
基地 Base Bar & Restaurant
地址：尖沙咀山林道29-31號廣利樓地下A號舖
