蘭桂坊雙層藝術Cafe”Revtime 時光逆流”，相信好多人都有耳聞，原來店家最近佢哋喺上環開設新店——「Revtime 殤城逆流」！門口由雨傘牆畫圍繞，店內又有一系列香港城市油畫，又有雞蛋與高牆等特飲，取名「殤城」，背後意義無須多講。店家落地窗外，即是一片林蔭，陽光明媚嘅日子造訪，望著樹影搖曳，感覺份外舒心。
內容目錄
食品取名經典電影 食品文藝味濃
與中環店一樣，殤城逆流食物一貫高質，不走和風路線，料理較為西式，餓可揀份量大啲嘅牛扒餐或嘗招牌All Day Breakfast，口痕歎份手工蛋糕都係唔錯選擇。另外，特飲都好有詩意，以不同經典電影為靈感打造，好似《北非諜影》嘅Mocha系列、《阿甘正傳》嘅Cocoa系列、《驕陽似我》嘅Milkshake系列……充滿藝術氣息，加上窗外綠意盎然嘅樹景，別有一番風味。
✦ 法式紅酒牛肩配薯蓉 HK$268
可揀Augus或US Prime牛，今次我哋就揀Augus。牛肉較少脂肪，食上口肉味較濃，5成熟唔韌又Juicy，兩大塊，份量不少！
✦ 素版英式全日早餐 HK$128
因為叫咗扒，我哋揀素All Day！有炒蛋、牛角包、牛油果、沙律、薯餅及厚切蕃茄，款式多多。炒蛋嫩滑、牛油果夠熟、牛角包香甜酥脆，基本上無咩好挑剔。
✦ 雞蛋與高牆 HK$68
小編與朋友都勁愛呢杯特飲！同中環店嘅巨型綿花糖Cocoa相似，呢度都係綿花糖＋Cocoa嘅組合，不過多咗層厚蛋白及奶油，似朱古力版嘅蛋白杏仁霜，香濃綿滑，有點邪惡，但飲完好滿足！
✦ 《簡‧愛》HK$48
肉桂＋玫瑰嘅Mocha，組合簡單經典，但好飲！比一般Rose Mocha濃重，夾雜可可與肉桂，鍾意濃郁嘅朋友一定啱飲！
✦ 殤城逆流招牌蛋糕 HK$58
招牌蛋糕似乎會按時令改變，今次嘗到嘅係朱古力布尼朗，上面有芒果慕絲及微微辛辣，整體感覺都幾得意！
【詳情】
Revtime 殤城逆流
地址：上環皇后大道中181號新紀元廣場2樓202-203號舖
IG： @revtime.cityofsadness
