收工去居酒屋啤一啤，告別一天嘅勞碌，日本人就最懂呢份風雅！
近來，銅鑼灣Midtown新開嘅「Nami 浪‧居酒屋」，以江戶時代燈紅酒綠嘅酒食文化為藍本，提供各式刺身、燒烤、鍋物料理，仲有豐富嘅酒類選項，不失為一個食好西，大口喝酒嘅好地方！每晚8時，店家仲會有擊鼓祝酒活動，全場會係澎湃嘅鼓聲下乾杯，埸面熱鬧，相信好快會成為CWB上班族嘅收工聚脚點！
內容目錄
日本小巷居酒屋風情 營造休閒感
Nami浪‧居酒屋座落在東瀛食肆雲集嘅「覓食橫街」登龍街，餐廳以東京大街小巷嘅傳統居酒屋為設計藍本，採用紅色和深啡色木材作主色調，托出江戶時期嘅日式風情。餐廳盡頭嘅小廂房，仲有手繪嘅京都祭典街頭景像，加上木質趟門及櫻樹布置，環境雅致得嚟又私密，最啱成班朋友聊天放鬆。
酒品豐富 必嘗自家品牌Sake「浪‧特別純米酒」
講到居酒屋，酒一定係主角！Nami浪‧居酒屋提供多款種類美酒，有日本入口嘅清酒、米酒、梅酒及啤酒，亦有歐洲進口嘅白酒及紅酒等，基本上唔難搵到鍾意嘅口味。另外，Nami浪‧居酒屋仲有自家品牌特別純米酒「浪酒」，廠房設置係日本，以100%日本產米製作，高精米度，故酒體微甜，口感份外清徹。無論係齋飲，或配油膩嘅天婦羅、鮮味嘅刺身都恰到好處。
擊鼓派清酒 全場乾杯助興
Nami浪‧居酒屋為打造日本祭典般嘅熱鬧氣氛，每晚8點，店員都會揮起鼓棒擊鼓，向每位食客贈送清酒助興，係主持人嘅帶領下，全場祝酒同歡，場面熱鬧！
店員有節奏地擊鼓，將氣氛推至高峰！ 
店員會為每個客人遞上一杯清酒。 
喺主持帶領下，全場「乾杯」！
種類繁多 地道日本美食
唔好以為居酒屋嘅主角一定係酒，種類繁多嘅美食都好緊要！Nami浪‧居酒屋推供過百款地道日本美食，如刺身、壽司、卷物、串燒、涮涮鍋、壽喜燒，選擇多多。食材基本上都係採用時令新鮮食材，以傳統日式烹調手法製作，唔會有多餘調味，呈現返食材原味嘅鮮味。
✦ 火炙蔥吞拿魚腩 HK$108
唔淨止食，店家係經典中都不乏創新，獨創DIY壽司卷物。好似「火炙蔥吞拿魚腩」，係日式托盤上放咗紫菜、蛋黃、白飯及蔥吞拿魚腩，食客可以按照自己喜好，任意搭配並放置食材係紫菜上，用手輕輕一卷，一道美食即準備就緒，好玩又好味！
✦ Nami壽司 HK$168
壽司之中，小編對Nami壽司最印象難忘，入面有魚子醬、海膽、三文魚籽、玉子，加上飯與紫菜，用料超豐富！一啖放入口，各種食材嘅鮮味喺口腔交織，令人一試難忘！
✦ 原條鰻魚丼 HK$188
令我印象難忘仲有蒲燒鰻魚飯！係原條鰻魚直上！勁厚肉，平均約1cm厚、差不多有我一節手臂咁長！食起上嚟啖啖肉！真心勁足料！
✦ 吉列拼盤 HK$198（部分食材會按時令更改）
呢道拼盤非常豐盛，包括以時令海鮮構成嘅吉列海鮮拼盤，盤中有大蝦、肥蠔、沙追魚、魷魚、茄子、蓮藕和舞茸菇等，依時令產出而調整，令人味蕾大滿足。
✦ 各式佐酒小食
燒雞胸軟骨 HK$42 
燒薩摩赤雞雞腎 HK$48 
燒芝士魚餅 HK$58 
燒舞茸 HK$68
美酒點可以少得一系列串物？Nami浪‧居酒屋有十多款即叫即燒串物，全部採用日本時令新鮮食材製作，佐酒一流！
編輯評審
味道：4.5
環境：4
服務：4
CP值：3.5
（*5為最高分）
【詳情】
Nami 浪．居酒屋
地址：銅鑼灣登龍街1-29號金朝陽中心2期Midtown1樓
營業時間:
星期一至四 | 11am-15pm；18pm-22pm
星期五至日 | 11am-22pm
電話：23834038
IG：＠namiizakaya.hk | FB： @namiizakaya.hk
