Last Updated on 01/04/2021 by FLOWSPACE.HK
元朗國真係食日本嘢嘅天堂，想當年呢度發明咗拖鞋壽司，紅極一時，近年又開咗勁多燒食店、抹茶甜品店，想食咩日系料理都有！上個月，小編又發現馬田開咗間專食日本家庭式料理嘅小店——「喬木ARBOR」！提供一系列精緻嘅定食，好似親子雞、京蔥豚肉、吉列三文魚….. 全部餐都包茶碗蒸、前菜、味噌湯、烏冬及飯，非常豐富，喺度食飯，好似真係去咗日本嘅和食店咁！
內容目錄
簡潔裝潢 溫暖木傢俱 巨窗引入自然光
喺分享食物前，先講講喬木的裝潢。初初以為和食店都會帶有日本風味，估唔到呢度又唔係，反而好文青，更似一間咖啡店！
首先，成間店以杏色、白色及木色為主調，文青標誌顏色。其次，店子呈L型，兩邊各設一個接近落地嘅長方形大窗，充分引入自然光，配上白淨牆身，簡約又美觀。第三，進入店中，滿眼盡係清一色木傢俱，一盞盞米黃色射燈，營造咗一種溫暖感覺。整體感覺係咪似入咗間coffee shop？可惜呢度唔賣咖啡呢！
十款配菜連主食 CP值爆標午市定食
今次小編係嚟試午市定食，相比起全日定食會比較平啲，但主食、配菜、湯連白飯，加加埋埋都有10款，食物量真係非常多！店家仲附設無限添飯服務，唔夠，more多，即便大男人都絕對夠飽！
✦ 親子雞定食 HK$98
呢款親子雞嘅蛋煮得好滑，半生熟質感唔錯。洋蔥食得出炒過，幾香口。至於雞肉就屬正正常常，唔乾柴，不過略嫌淡味少少，無咩雞味。
✦ 京蔥豚肉 HK$108
呢款京蔥炒豚肉真係炒得好香，豚肉爽口得嚟幾嫩滑，加埋微辛嘅京蔥，成件事幾惹味，唔錯！
豐富配菜 營養均勻又滋味
日本定食之所以有好多細份、一碟碟嘅配菜，目的都係想食嗰個人可以食多更多款式嘅食物，攝取唔同營養，達至均衡飲食。係呢方面，喬木都做到好足，每一款午市定食，附贈松葉蟹肉茶碗蒸、三點前菜、漬物牛油什菌淺利味噌湯、迷你烏冬、白飯，樣樣有啲，高纖又多漬物，消化都好啲！
喺咁多款配菜中，個人都幾鍾意漬物牛油什菌淺利味噌湯，好濃味及足料，牛油香，加上蜆肉鮮甜，喺凍冰冰嘅天氣下，飲完好暖胃！
至於松葉蟹肉茶碗蒸就比想像中濃郁，水蛋偏實，唔係出面食到咁水汪汪，但一定要趁熱食，一凍咗，蟹肉就會有腥味。
前菜之中，有款牛舌條幾嫩，質感不錯！食時夾雜胡椒及洋蔥味，好開胃！
另外有埋枝豆，邊食邊等上餐，感覺不錯！
編輯評審
味道：4
環境：3.5
服務：4
CP值：3.5
（*5為最高分）
【詳情】
喬木 ARBOR
地址：馬田路38號怡豐花園地下63-64號舖
FB： 喬木 ARBOR | IG：arbor_2020
