南越及北越，前者愛甜，後者愛鹹香，飲食口味略有不同。
不過對比北越一味重魚露，南越嘅味道就層次變化大啲，除咗愛喺湯河加砂糖，仲會多加鹵水、豉油及辣椒等調味料，相對嚟講較能滿足挑剔嘅食饕需求。講到南越菜，最近小編留意到旺角開咗間新派南越餐廳”Nam Viet Nam Cafe 南越南咖啡廳”（下稱NVN Cafe） ！食到一系列由主廚「南越粉教父」Chef Justin調整過嘅南越Fusion菜，仲有全港首創嘅高樓炸米粉及越式蛋啤酒，越南控們一定不可錯過！
內容目錄
日賣400碗 牛隻精髓成就最濃郁牛肉粉
Nam Viet Nam Cafe主廚Justin（陳希裕）被譽為「越南粉教父」，曾創下日賣400碗越南粉嘅長龍紀錄！Justin祖母嘅南越牛肉粉食譜，經歷過南越、老撾、法國等口味影響而成，而佢傳承後亦曾將之帶到美國及香港改良。經過七次調整，今次喺NVN Cafe嘗到嘅湯底，採用咗由牛面頰至牛尾等牛隻五個部位熬煮整整24小時而成，再加上空運嘅新鮮金邊粉、牛肉片、牛面類、牛腱牛筋及牛丸等配料，呈獻出牛味最濃郁嘅「第七代」牛肉粉——「嫲嫲南越湯-招牌金邊粉」。
Pho最緊要係個牛骨湯底，說實話喺香港好難食得到正宗嘅湯底，因為無咩餐廳願意花大量時間及成本去熬湯！小編覺得可以喺NVN Cafe食得返越南隻味，甚至更濃，真係相當有驚喜！呢度嘅湯底味道濃郁得嚟唔膩，飲真啲仲有少少膠質！另外，最抵讚係個金邊粉，喺越南新鮮直送！越南粉之所以特別煙韌，唔會好似香港啲河粉咁一夾就斷，咁係因為米嘅成份比較多！連金邊粉嘅質素都咁講究，真係誠意十足呢！
南越街頭美食注入玩味元素
NVN 高樓米塔 HK$48 
NVN 南越法式麵包配肉湯 HK$78 
Shake Shake 雞軟骨 HK$42
NVN Cafe為南越街頭美食注人新元素，如推出全港首創嘅「NVN高樓炸米塔」，將越南米粉炸脆後叠高，吃前淋上以香茅，青檸葉等製成嘅濃湯，營造視覺效果之餘亦造就獨特Fusion風味！
另一款「NVN南越法式麵包配肉湯」，喺鬆軟嘅法包上塗抹自家製黑啤酒豬肝醬，佐以豬耳，燻路，扎肉等六款美味餡料，附上招牌肉湯供客人以法國「French Dip Sandwich」吃法沾汁，感受多重口感。
我第一次試到雞軟骨係用shake shake薯條嘅做法製作！裏面嘅香料有蒜香調味粉、辣椒、青檸葉同埋香茅，”Shake”起來更提昇咗雞軟骨嘅香脆滋味，玩味十足！小編鍾意呢道菜辣辣地又惹味，食起上嚟，成件事好有東南亞feel！
必食南越地道風味創意大變奏
脆米紙薄餅 HK$48 
烤蔞葉雞配青蘋果條 HK$78（半隻） 
烤慢煮12小時乳豬配生菜包 HK$180
餐廳亦將南越地道菜式進行創意變奏為食客呈現滿滿新鮮感，好似「脆米紙薄餅」，將當地人最愛嘅街頭小食「越南薄餅」（Banh Trang Nuomg）改良將米紙餅底炸至香脆鬆化，並重新配搭升級咗嘅配料，如越南香腸秘製酸瓜和檳榔葉等，層次豐富。
以姜葉烤肉卷（Bo La Lot）為靈感，以越南特色藥葉烤煮雞肉，誘發雞肉嘅鮮甜肉味，再伴以以蝦頭油炸嘅青蘋果條，讓味道完美平衡，酸酸甜甜，平衝返炸雞嘅油膩感。
乳豬是南越的傳統名菜之一，NVN Café則以現代嘅慢煮方法，炮製「烤慢煮12小時乳豬配生菜包」，並採用滲透壓嘅煮法，讓肉質保持鬆化多汁，再以低溫慢煮12小時後放至焗爐烤製，令外皮格外香脆，製作一絲不苟，
引入越南特色飲品 全港首見蛋啤酒
越式蛋啤酒 HK$48 
直接將啤酒加入蜂糖蛋醬即可，蛋啤酒係近年越南流行嘅地道飲品！
除了創意十足的菜式，餐廳亦推出多款吸睛飲品，好似NVN Café係全港首間引入近年越南好Hit嘅飲品「越式蛋啤酒」嘅餐廳！自家製嘅蜂糖蛋醬與清爽嘅越南啤酒融和，啤酒伴隨陣陣香甜蛋香，味道令人驚喜！
越式蛋咖啡 HK$28 
以綠豆粉調味，整體口感更香濃，又可自行調整鍾意嘅甜度。
被視為國民飲品的「越式蛋咖啡」，喺NVN Café嘅版本，相對越南飲到嘅無咁重口味。面層浮著微暖香脆嘅焦糖蛋醬，咖啡冰涼香滑，冰火滋味，帶嚟微妙嘅雙重口感！另外，小編好鍾意佢哋會用綠豆粉調味，無砂糖咁無益，又可加添咖啡嘅香濃口感，感覺不錯。
餐廳亦提供本地少見的越南手工精釀啤酒Heart Of Darkness，三款口味包括越南辣椒、越南金桔和柚子味花香，比大家如置身當地小酒吧嘅感覺。
新舊兼融 型格鎂光燈 文青森系裝潢
NVN Cafe旨在將各種似乎雲壤之別嘅食材及文化放在一起，擦撞出新滋味。整體餐廳裝潢都貫徹主題，融合多元化元素，以綠色為主調，加入型格鎂光燈、文青系木椅餐桌，新舊融為一體，感覺充滿活力呢！
編輯評審
味道：4.5
環境：3.5
服務：4
CP值：3.5
（*5為最高分）
【詳情】
Nam Viet Nam Cafe 南越南咖啡廳
地址： 旺角彌敦道726號1樓
