【2023】上三兩Sexy Crab 華麗「蟹」逅

食蟹唔一定係秋天專利，「上三兩Sexy Crab」蟹麵專門店自進駐尖沙咀K11 MUSEA後，一年四季都會供應時令蟹肉招牌菜，如特濃蟹粉蟹肉拌拉麵、特濃蟹粉石鍋拌飯、Sex Swing……等等，均加入由大廚設計嘅黃金比例蟹膏醬，加上中西合壁嘅烹調手法，菜式創新又別致！另外，每道菜都已經過人手鮮拆蟹粉及蟹肉，可以唔駛剝殼，優雅品嘗鮮蟹菜餚，愛蟹之人一定不可錯過！

內容目錄

老上海酒廊風格復古時尚兼容

上海鄰近大閘蟹盛產地陽澄湖，食蟹文化源遠流長。至民國上海，食大閘蟹更係一種風尚，不論公母蟹、食蟹動作、食蟹嘅拌菜及飲料都十分講究。蟹，更成為文人墨客筆下嘅靈感泉源。
為咗重現食蟹風尚，Sexy Crab以30年代老上海酒廊為題，如桃木特製餐桌椅組、仿鏽鏡牆、鏡面天花、寶藍窗簾及粉紅霓虹燈等，懷舊與時尚兼容。

新派手藝炮製鮮味蟹宴

店子之所以取名「上三兩」，同樣與大閘蟹好有淵源。每逢大閘蟹當造時節，店家一定會嚴選超過150克丶即3兩重嘅江蘇大閘蟹入饌，這個重量剛好，蟹不會太大而肉質過老，亦不會太細而食兩啖就無，以此為題，喻意店家造蟹嘅用心態度。除大閘蟹，店家亦會引進其他時令蟹種，根據唔同螃蟹季節及其特質而調整菜單。將蟹蒸熟後，師傅又會用工具拆出蟹肉、蟹膏和蟹黃，過程必須夠快，先可大大保持蟹肉鮮味。之後再配合慢煮、油封等手法，功序繁瑣，每道菜都費盡心思。

✦ Sex Swing HK$568

小編因為呢個蟹粉吊架而慕名而來！真係精致到令人唔捨得食！
一個吊架共有四款蟹粉點心，每款各2粒，包括燒和牛配蟹粉、風呂吹大根配蟹粉和魚子醬、慢煮赤雞胸海膽卷配蟹粉，以及花雕鮮帆立貝配蟹粉。其中，我最愛燒和牛配蟹粉，半生熟和牛，肉味濃郁嫩滑，表面燒得脆口，加上鮮味蟹粉，一鮮一香，口感好正！其次，花雕鮮帆立貝配蟹粉都不錯，帆立貝半生熟，啖啖肉，肉中滲透濃濃嘅花雕酒酒香，與蟹粉好襯！

✦ Flirty Go-Round HK$568

除咗蟹粉吊架，另一款造型超靚嘅就係呢款花雕酒架Set！將頂層嘅花雕酒倒向酒架中嘅洞口，花雕酒會緩緩落下，分別流入8隻裝有不同配料嘅酒杯中。因著配料嘅不同，花雕酒都會呈現不同口味。
花雕酒架Set同蟹粉吊架一樣，四款口味配料，每款各2杯，包括薑汁花雕、話梅花雕、陳皮花雕，以及桂圓花雕。個人最愛桂圓花雕，酒味溫和得嚟帶點桂圓嘅清甜，口感不錯。

✦ 特濃蟹粉蟹膏拌拉麵 HK$368

喺店員建議下，小編又order咗招牌菜式「特濃蟹粉蟹肉拌拉麵」，據說用咗足足12隻大閘蟹嘅蟹粉製成！
上枱時，蟹粉配料同麵係分開上，包括雞湯湯配蟹肉、蟹腳肉、蟹公膏、蟹母膏、蟹油，可按個人喜好，自行加入配料，我就貪心啲，一口氣全部混埋食，膏與黃，口感鮮美又有咬口！
至於拉麵，麵質偏硬，我個人較受腍啲嘅麵，所以就一般般。