又到草莓季！近來多間酒店下午茶都換上草莓主題！小編身為下午茶怪，當然要精選好嘢同大家分享！喺咁多間酒店中，今次我就揀咗帝京酒店Lion Rock，皆因佢哋嘅「水漾春日下午茶」，聯乘咗聞名嘅護膚品牌Elizabeth Arden，並以品牌招牌產品「透明質酸膠囊」為靈感，炮製一系列鹹甜美點，無論係打卡或味道都令人滿意！
內容目錄
紅金色主調 招牌膠囊造型甜品
Elizabeth Arden嘅膠囊精華係其招牌產品，向來都多女士Fans。今次酒店大廚除了以全新嘅透明質酸豐盈保濕膠囊為靈感外，更以其品牌嘅主色調設計成甜品，以及時令日本草莓，鹹甜美點造型精緻，靚到令人唔捨得食！
✦甜點
包括：金箔櫻花水信玄餅、草莓白朱古力慕絲蛋糕、草莓抹茶朱古力千層酥、草莓意大利芝士慕絲、54% 朱古力草莓慕絲蛋糕伴草莓漿球
講到賣相最靚，一定係金箔櫻花水信玄餅！晶瑩嘅寒天入面有鹽漬櫻花，食時散發淡淡幽香，仲有整片金箔作點綴，令人少女心爆發！
其次，我勁鍾意54% 朱古力草莓慕絲蛋糕伴草莓漿球！大廚以Elizabeth Arden招牌嘅膠囊精華為靈感，模仿膠囊精華的金色球其實是流心草莓漿球，一切開即流出草莓漿，充滿視覺效果。下層的仲有朱古力草莓慕絲蛋糕，外層則係瑞士蓮出產嘅54%黑朱古力所製成嘅慕絲，內有法國野草莓及日本草莓果蓉製成的啫喱，整體味道層次分明，個人最為喜愛！
大廚先以草莓做成慕絲，並夾於自家製嘅千層酥之中，香滑嘅慕絲配上酥脆的千層酥，令人吃不停口，慕絲中更藏著草莓啫喱，增加口感。最上層嘅日本草莓，旁邊則唧上抹茶軟心朱古力，茶味與朱古力嘅比例恰到好處。
原粒日本草莓放置於甜品杯中，伴以手打忌廉及馬斯卡邦尼芝士（Mascarpone Cheese）慕絲一同進食，入口奶味香濃而幼滑，果肉香甜多汁，底層再加入野莓啫喱，有助提升口感。
金色朱古力脆片下，是以港人所愛的朱古力品牌－瑞士蓮出產嘅36%白朱古力炮製而成嘅慕絲，奶味香濃。蛋糕內特別加入草莓啫喱及海綿蛋糕，細嚼更可品嚐到草莓果肉，莓香與白朱古力嘅奶香一拍即合！
整體嚟講，令我驚喜係全部甜品都唔會太甜，感覺係平時外面食嘅下午茶嘅半糖程度，啱晒怕肥又為食嘅女生！😜
✦鹹點
包括：松葉蟹沙律、火炙三文魚手鞠、黑松露野菌玉子燒、碎吞拿魚腩牛油果最中餅
我次次嚟Lion Rock，最期待都係佢哋嘅鹹點，大多以刺身或壽司為主，精緻程度拍得住Omakase！
今次鹹點之中，我最愛火炙三文魚手鞠壽司，名字是其外形與手鞠球相似而來，Size小巧，放入口中剛剛好，經過火炙，三文魚油香於口中徘徊，感受滿滿嘅幸福滋味。
另外，我未食過「最中餅」係用紅豆蓉以外嘅食材整！😂酥脆嘅最中餅，配合切碎嘅吞拿魚腩及牛油果，成件事幾fresh，雖然味道幾得意，不過個人還是較愛紅荳餡。
第三令我印度深刻，莫過於黑松露野菌玉子燒！睇落簡單平凡，但食得出好有心機，一圈圈玉子入面夾咗野菌及黑松露配料，外層微微焦香，內層又有芬香嘅黑松露及野菌，食一舊絕對唔夠喉！
大廚將松葉蟹拆肉及調味，再砌成蟹肉小山丘放於青瓜上，進食時記得要一同放入口中，松葉蟹嘅鮮味於口中爆發，配合清新爽脆嘅青瓜，立即喚醒味蕾。
以酒粕發酵嘅「赤酢」，帶有豐醇嘅酒香，同酸甜嘅草莓幾夾，食完幾開胃。
✦ 甜蜜特飲
今次特飲係Ocean Blue及White Tea Latte。粉藍色嘅Ocean Blue，其實係以蘋果汁加入鮮奶及藍糖水調成，酸酸甜甜，加上薄荷葉增添清涼感；而White Tea Latte就以壽眉、鮮奶、薰衣草及玫瑰糖水調成，奶泡香滑，中間散發壽眉及花香，清新怡人，真係唔錯！
首推四層架外賣下午茶
今次Lion Rock仲首度推出下午茶外賣及外送服務，下午茶連雅緻四層架，令人安坐家中都可以享受美點，而家係網上商店訂購更可享8折優惠！
編輯評審
味道：4
環境：4
服務：4.5
CP值：3.5
（*5為最高分）
【詳情】
Lion Rock
地址：九龍太子道西193號帝京酒店3樓
網站：https://www.royalplaza.com.hk/hk/lion-rock/
