正值櫻花季，可惜今年無得飛，只好喺城中發掘櫻花系Cafe，一圓花見嘅心願吧！講到近來熱門、又可坐得耐嘅Cafe，莫過於位於灣仔菲林明道嘅”NATURA:”！開業首日，小編已造訪，非常驚喜係店子比想像中大（目測約1000呎大），由天花板到餐枱都放滿櫻花布置，超igable！至於食物，店子以一系列創意輕食，好似雲朵Bagel及金沙芋泥窩夫等；咖啡則有3款豆可以揀，口味分別有Nutty、Fruity及一款精品咖啡豆，迎合唔同人口味。
內容目錄
花藝師主理 唯美花房咖啡店
NATURA:嘅老闆係從事花藝行業，所以店子布置都唔似出面嘅花系Cafe，用啲好假嘅膠花嚟做裝置，而係用繡球花乾花製成花瓣，無論遠睇定近望都非常精緻！另外，店子高樓底高，顏色以大地色系為主，嚟到都不自覺有種放鬆感。
花藝布置，無論遠睇定近望都非望精緻。 
以繡球花瓣仿造櫻花效果。 
以櫻花為主題，打造嘅雅致空間。
據官方表示，NATURA:會隨花季，定期更換花藝布置，好似今年4至6月，就會以櫻花為主題，比嚟到嘅人時時有唔同驚喜。另外，Cafe仲有一角係賣部，可比人買走乾燥花盆景，亦可預訂花束，食買賞一條龍。
入門口見到2面圓鏡，預意「：」，希望與來臨嘅人展開對話。 
店子賣各式各樣盆栽植物，當中唔少品種都幾少見。
健康低碳飲食 特色雲蛋Bagel
食物方面，NATURA:主打米芝蓮二星餐廳廚師主理嘅低碳飲食，好似雲蛋Bagel就是低卡健康之選。將蛋白打發再焗，打造成雲朵模樣，賣相好治愈。另外，店内亦提供多種口味窩夫，即叫即烤，必食有金沙芋泥窩夫，用鹹蛋黃醬及豬肉鬆製成，好有港式地道風味！
飲品亦選擇多多，光係咖啡都有3款豆可揀，口味分別有Nutty、Fruity及一款精品咖啡豆，迎合唔同人需要。店內亦有招牌Signature Cafe Latte，啡體偏Nutty，可比客人揀荳奶，係啡控必試之選。
✦ Cloub Egg Bagel HK$78
將蛋白打至起泡再焗，製成Cloub Egg，賣相好吸引！入面仲有牛油果及Butter Cream，加上Bagel，比較健康輕盈。個人建議可以加個醬去比人調味，蛋無調味會有啲dry，另外牛油果亦唔夠熟，食上口有啲硬。比較正係Bagel，焗得外脆內香，味道幾好。以灣仔物價，加上咁大鋪位，呢個Bagel價錢唔算貴。
蛋白打得鬆軟，入口即化，口感特別！ 
切開蛋黃，蛋液澎湃流下，感覺好治癒！
✦ Signature Cafe Latte HK$55
呢個latte可轉荳奶，啡體偏Nutty，飲時堅果味濃，我都幾鍾意。
溫暖陶瓷質感，具有良好保暖作用。 
連咖啡豆都可揀，非常貼心。
編輯評審
味道：3
環境：4
服務：4
CP值：3.5
（*5為最高分）
【詳情】
Natura:
地址：灣仔菲林明道8號大同大廈地鋪
註：店子設有人均HK$150最低消費。
