經過尖沙咀堪富利士道，眼利嘅朋友應該都會發現呢度開咗間新咖啡店”another one“。名如其店，another one就係一間與別眾不用嘅咖啡店。喺呢度唔會見到Cafe常見嘅All Day、意粉或Bagel，而係嘗到一系列越南美食！其中，必食招牌火車頭牛肉河粉及流心蝦多士，水準唔錯得嚟，份量亦大。最近，店家仲推出情人節限定甜品「玫瑰拿破崙」，超igable，喜歡打卡嘅女生不可錯過！
內容目錄
大地色系 和諧越法風
another one位置唔大，不過坐位闊落，坐得尚算舒服。進店第一下令我諗起越南嘅美奈沙漠或法國嘅Dune du Pyla，橘啡cool信、青色餐巾、米白牆身、木系藤椅……和暖大地色系，令人不知不覺有放鬆感覺。另外，最吸睛莫過於陷在門口旁嘅餐牌，沙洞式嘅設計，打卡100分！
新派越法美食 別樹一格咖啡店
食物方面，another one主打越法美食。飲食風格無話分唔分「北越」或「南越」菜系，主要依店主個人口味，再經過調配所創作嘅新派口味。好似店內嘅招牌流心蝦多士，又會配印尼蝦片及牛油果醬、越南冰牛奶咖啡上，又會加入肉桂等等，唔算好正宗傳統，但一定係你喺出面試唔到嘅口味，令人幾有驚喜。
✦ 招牌火車頭牛肉河粉 HK$92
呢款火車頭都幾足料！有生熟牛肉、牛丸、牛柏葉及牛展，樣樣都有啲，好滿足！當中最愛生熟牛肉及牛丸，又爽，牛味又濃，正！湯頭偏鹹香，感覺隻味偏北越口味，個人都偏鍾意北越重魚露嘅口味，所以幾buy！美中不足係河粉質量一般，因為拍攝時間較長，夾起河粉即有斷開情況，顯示河粉米度不足，未夠煙韌。
✦ 流心蝦多士 HK$70
呢款蝦多士真心有驚喜，芝士超多，打開係層層拉絲，睇見都覺得治癒！係多士之間仲夾咗兩層蝦滑！蝦滑之間仲有原隻蝦肉，加上烤得香脆嘅多士，口感好豐富！
另外，伴碟仲有印尼蝦片， 點著墨西哥風嘅牛油果醬食，非常香口。
✦ 情人節法式聖安娜泡芙 HK$88
呢款甜品係2月限定！心型嘅拿破崙餅之間，有層層香滑嘅忌廉，整體味道都唔錯！個人最鍾意佢中間有個玫瑰朱古力花，睇得又食得！
✦ Morning Viet HK$45
北越好興越南冰牛奶咖啡，無諗過呢度都有！呢度個冰咖啡無越南飲到嘅咁rich，但對我嚟講剛剛好，我反而受唔到北越嘅超濃咖啡！另外，咖啡底部有一層香甜嘅煉奶，可以平衝返咖啡嘅酸苦風味，整體我都鍾意。
✦ Kyoto Hojicha Latte HK$52
無諗過呢度有我最愛嘅焙茶latte，當然要試試！呢度嘅拉花確係靚，天馬圖案好cute！味道上就屬正常，茶香幾濃。
編輯評審
味道：3.5
環境：3.5
服務：4
CP值：3.5
（*5為最高分）
【詳情】
another one
地址：尖沙咀堪富利士道6-6A號爵寓地鋪
FB：＠anotherone.cafe ｜ IG：＠anotherone_hk
