全新馬拉菜餐廳霹靂南洋 Restoran Perak登陸旺角！店子係位於「馬來西亞最美麗島嶼」邦咯島嘅餐廳「南洋1957」嘅首家海外店。以霹靂州美食為賣點，並為招牌菜加入港人最愛嘅火鍋元素，好似用砂煲奉上嘅「霹靂仁當牛腩煲」、怡保芽菜雞或咖央多士等，融入港式元素又不失馬拉風味，口味正宗，但絕不傳統，集百家之成，實顯娘惹菜嘅真諦。
內容目錄
壁畫藝術 怡保畫作 南洋大排檔風味
先講講環境，餐廳除咗仿傚馬拉常見嘅大排檔來設計，仲帶濃厚嘅馬拉藝術氛圍，好似重現咗檳城名壁畫，姊弟單車圖，以及霹靂洲年輕畫家嘅畫作，以柔和的水彩、剛勁嘅筆觸描畫怡保嘅風景與食材，為餐廳注入與別不同嘅南洋風情。
馬來西亞有名壁畫「姊弟共騎單車」。 
老闆Simon年輕畫家朋友嘅手繪畫作。 
店內有好多懷舊陳設，展現南洋風情！ 
雖為大排檔風格，但喺係室內用餐，環境好舒適！
地道馬拉菜 融入港式元素
馬來西亞係一個多國民族結合嘅國家，所以馬拉菜其中一個核心精髓就係集百家之長，隨地方演化！來到香港，霹靂南洋當然都加咗港式元素，除更迎合港人口味，亦令菜餚更貼地，實顯娘惹菜嘅真諦。喺呢度搵到好多口味正宗，但絕不傳統嘅霹靂州美食，好似招牌霹靂仁當牛腩煲及老巴剎肉骨茶就用砂煲奉上，食完仲可保留湯底打邊爐；咖央多士就改用港式西多做法，以牛油酥炸多士再夾咖央醬，邪惡度爆標！
✦ 霹靂仁當牛腩煲 HK$108
「霹靂仁當牛腩煲」係東南亞嘅著名美食，「仁當」即乾咖哩，以香料、辣椒及椰奶與牛腩，以中菜嘅烹煮方式「煲、焗、煲、焗」兩小時，令牛腩入味有咬口，並持續咖哩嘅辣勁。
個人好鍾意呢款咖哩汁，濃郁香口，但一啲都唔膩！牛腩好腍好入味！齒頰留香！加上以砂煲奉上，熱辣辣咁食特別有風味！
火鍋可追加配料，必食安格斯肥牛！ 
追加配料鮮魷魚。
吃罷滾熱辣嘅主菜，保留原汁原味嘅「湯底」，可再追加火鍋配料！好似今次我就追加咗安格斯肥牛（HK$68）及鮮魷魚（HK$38），肥牛油花均勻，入口即化；鮮魷魚煙韌有咬口，感覺都幾正！
✦ 怡保芽菜雞（例）HK$68
香港好少食到令我滿意嘅芽菜雞，呢度嘅版本都算係其中之一。我最愛佢哋使用怡保直送嘅肥短芽菜，鮮甜多汁，可以中和雞件嘅油膩感，再配上自家製薑蓉和甜黑豉油，還原度好高呢！
夾起都睇到個質感好嫩！ 
雞件底部全係怡保嘅肥仔芽菜，好正！
✦ 咖央西多士 HK$38
我仲食咗經典甜食「咖央多」！不過呢度嘅做法係加咗少少本地炸西多嘅元素，而唔係馬拉般用烘多士，邪惡度升咗一大級，不過真心好好食！咬開酥脆嘅西多，入面釀滿半溶咖央，加埋牛油及糖漿，肥死都抵！
✦ 參巴辣醬炸豆腐 HK$28
餐廳嘅參巴辣醬唔係用啲廠做嘅行貨，而係自己以蝦膏、蝦米與辣椒調製而成，嚴格遵從南洋1957嘅口味！好有誠意！辣得嚟又鮮味十足，再配香口嘅炸豆腐，食完咀巴有點麻，但非常過癮！
編輯評審
味道：4
環境：3.5
服務：4
CP值：4
（*5為最高分）
【詳情】
霹靂南洋 Restoran Perak
地址：旺角彌敦道575號 Ladder Dundas 5樓
IG：@restoran_perak | FB：@restoran_perak
