唔少人都視日本為鄉下，為咗解思鄉之情，何不去日系喫茶店，幫自己締造一趟偽旅行？最近喺日本京都、創立咗超過50年嘅昭和喫茶店Sonia Coffee（ソニアコーヒ）正式登陸香港！店家帶嚟一系列自家焙煎嘅咖啡豆、虹吸咖啡、招牌原味鬆餅、輕食及甜品！除味道充滿昭和老店嘅風味，店子裝潢亦以懷舊嘅木系深色調子為主，身為崇日啡友，當然不可錯過！
內容目錄
京都逾50載經典 自家焙煎咖啡豆、虹吸咖啡
虹吸咖啡係昭和年代嘅喫茶店象徵，Sonia Coffee作為京都開業逾半世紀嘅老店，當然以此為主打。店家至今仍堅持自家焙煎咖啡豆，並以虹吸咖啡壺，沖煮出清爽而帶回甘嘅醇香咖啡。日本喫茶店著重人情味，為咗比客人體驗日本地道招待，Sonia Coffee咖啡師會將沖好嘅虹吸咖啡壺提到客人面前，親自將咖啡倒入自選杯具中，過程中，大家可與咖啡師交流，零距離接觸。
基本上，Sonia Coffee嘅虹吸咖啡係不定價，因日本長谷川家族會按時令、品質去揀唔同嘅咖啡豆，咩時候飲咩味嘅啡，所以價格會有所浮動。好似今次小編試嘅虹吸咖啡，約HK$80左右，啡體比較甘甜，Nutty，好啱夏天飲！店家唔固定選用一款咖啡豆，就係想嚟Sonia Coffee嘅人每次都飲到唔同嘅味道，帶來驚喜。
自選咖啡杯 盡顯個人化喫茶趣
除此之外，Sonia Coffee香港店更為大家提供一系列手調咖啡及特式飲品，當中包括喫茶店經典嘅昭和雪糕梳打，更設有巨峰葡萄、白桃及甘王草莓三款口味，絕對是「打卡」之選！為了呈現昭和年代和洋兼容文化特色，Sonia Coffee仲特別從日本及世界各地搜羅精緻咖啡杯，當客人點選虹吸咖啡或其他熱飲配任何食物時，均可以自選心水嘅咖啡杯款色，盡顯個人化的喫茶體驗。
✦ 巨峰葡萄昭和雪糕梳打 HK$68
用飲管吸，一開始會飲到清新嘅巨峰葡萄梳打！攪拌後，係香甜軟滑嘅雲尼拿雪糕！雖則邪惡，但真心好消暑！
✦ 抹茶鮮奶 HK$42、泡沫鮮奶 HK$36
以京都直送抹茶粉沖泡，口感甘香幼滑。 
西式宮廷杯子，懷舊味十足！
必食厚鬆餅 細味昭和年代標誌甜品系列
講到昭和喫茶店，最具代表性嘅甜品必然係厚底鬆餅！Sonia Coffee嘅原味鬆餅均係日本直送，長谷川家族職人先以蜂蜜、日本麵粉、雞蛋及楓糖漿等材料製餅，到港後，當有客人落order，店員就會即席以慢火烤烘，令鬆餅上枱可保持最鬆軟嘅口感！小編仲好愛佢嘅特濃蛋香，一個人都輕鬆KO 2大塊，絕對不可錯過呢！
除了鬆餅外，另一款必食嘅就係焦糖吉士布丁！呢款布丁係Sonia Coffee香港店嘅限定菜式，同樣係日本每日新鮮直送，所以供應量有限，想食就要趁早啦！
✦ 喫茶店原味鬆餅 HK$88（2件）
✦ 忌廉焦糖吉士布丁 HK$38（香港店限定）
小編食布丁無數，但款布丁真心係食過最香濃！或許係加咗布丁，香甜中不失濃厚口感，最正係焦糖及蛋味， 一啖甜一啖雞香，味道層次分明，真係非常高質！
✦ 抹茶梳乎厘芝士蛋糕 HK$44
除了兩款必食的經典甜品外，Sonia Coffee仲有各款甜品可供選擇，如梳乎厘芝士蛋糕及和栗磅蛋糕等等。小編最愛係抹茶口味嘅梳乎厘芝士蛋糕，濃郁茶香，但不失鬆軟口感，必能滿足茶控味蕾。
✦ 糖心蛋沙律吐司 HK$48
唔想下下食甜嘢？Sonia Coffee另設一系列輕食，如全日早餐、各式吐司及意粉等等，每一款都別具特色，正餐或茶點嚟食都無問題。個人極愛糖心蛋沙律吐司！一嚟CP值極高，二嚟店家嘅吐司均係日本直送！唔係一般食到嘅吐司，咬開係一層層，有少少似酥片，口感超特別！簡單配上糖心蛋及沙律即可，非常推薦！
編輯評審
味道：4.5
環境：3.5
服務：4
CP值：3.5
（*5為最高分）
【詳情】
Sonia Coffee
地址： 旺角新世紀廣場MTR層M52號鋪
IG：@soniacoffeehk | FB：@soniacoffeehk
