提起日本料理，好多時都會諗起魚生、火鍋或者拉麵……其實佢哋係有代表性，卻唔係日本家庭常食嘅家常菜！究竟日本嘅「家的味道」係點？最近，山林道和式料理店「Grandmama Cafe 婆婆珈琲屋」推出全新晚膳定食，以日本家庭式料理為主打，無論味道、營養或賣相都非常正宗！另外，仲有一系列糅合日式與港式嘅創意甜品！無得飛，去婆婆度嘆返餐，食住解思鄉，不失為一個理想選擇！
內容目錄
昭和裝潢 展現日系和洋美
Grandmama Cafe 婆婆珈琲屋裝潢主打和洋合一嘅昭和風格，有復古卡位、掛牆電話、玻璃吊燈、懷舊海報或精緻家具，每個細節都超igable！店內另設時裝店及雜貨店，提供大題Vintage單品，復古迷不可錯過！
和式家庭風味 菜式繁多 營養均衡
提到日本家的味道，必決條件係菜式繁多、營養豐富。Grandmama Cafe 婆婆珈琲屋嘅晚膳亦以此為靈感，打造出4款套餐，每個餐都具備前菜、湯、漬物、主食及飯麵，細細碟，量少，令食嘅「家人」得到最均衡營養，又不會食得過量。喺食材方面，套餐用上各式豆類、海藻海草、蔬菜、魚貝類、蕈菇類或根莖等材料，用料豐富又唔會好重調味，健康與美味兼備，成件事都令人食得舒服。
✦ 北海道三文魚奶油燉菜定食 HK$148
呢套定食係小編至愛！個奶油實在太香呀！ 唔同一般嘅白汁，淡茂茂，呢個汁係有陣魚鮮味！濃郁得嚟唔膩！最正係個三文魚肉，經過香煎，送飯一流！基本上，我係輕鬆KO晒一碗牛蒡絲飯，好正！
✦ 金平牛肉定食 HK$138
呢款我哋都覺得唔錯，雖則比較普遍，驚喜度不高。金平牛肉有舞茸菇及冬菇，又有蓮藕片，高纖又營養豐富！係屋企嘅味道呢！
✦ 明太子富士山飯團 HK$18
跟定食可以以 HK$18追加飯團。講起飯團，我其實覺得婆婆係幾唔穩定，早前有一兩次食到嘅飯粒有點硬，最近呢幾次都夠濕潤，有進步！據說係換了廠房同溫度管理呢！
如果問我進步嘅空間，我諗我會較想再多啲餡！身為明太子怪，如果飯團得1/3餡，實在不夠滿足呢！
✦ 海苔洋蔥櫻花蝦飯糰 HK$18
呢個飯團我極鍾意！同傳統日式飯團唔同，店家有加炒香過嘅蒜茸及洋蔥入飯，意外地幾香口，有點港式味道！😝
✦ 玉桂蘋果焦糖布甸 HK$42
呢個布甸次次嚟我都必點！對於蛋香濃郁嘅布甸，說實話我都零抗拒力！今次試改良版，多咗焦糖蘋果，味道更有咬口及層次感，幾好！
✦ 香港奶茶‧獅子山 HK$98
我每次嚟都食沖繩海鹽‧富士山，今次試佢新出嘅香港奶茶‧獅子山。由於同獅子山有關，蛋糕口感比較鞋，我就一般，不過抵讚係個奶茶雪糕，因為真係太香濃！好似飲緊凍濃郁奶茶咁，正！😍
✦ 婆婆杯茶 – 蘋果 HK$56
由老闆娘親自釀製嘅果醋，有少少酒精成份，食完飯團及甜食，飲返杯好解膩。
編輯評審
味道：4
環境：4
服務：4
CP值：3.5
（*5為最高分）
【詳情】
Grandmama Cafe 婆婆珈琲屋
地址：尖沙咀彌敦道176號The Nate 1樓
1/F, The Nate, 176 Nathan Rd, Tsim Sha Tsui, Hong Kong
They are OPEN:
Tuesday – Thursday | Sunday – Monday
12:00am – 10pm | 9:30am – 10pm
Tel: 96751438
