疫情持續，通關無期，只好透過偽旅行，止止旅遊癮！其中，小編好推薦屯門黃金海岸酒店，呢度椰木樹影，擁有漂亮嘅海灘及住宿設施，猶如置身邁亞密般休閒！最近，酒店嘅餐廳「聆渢咖啡廳（Cafe Lagoon）」仲推出咗逢周末及公眾假期限定嘅甜蜜「蜂」味下午茶！下午茶以澳洲蜂蜜入饌，打造11款鹹甜美點，全部都潤補得嚟可口，加上點心均會盛放喺六角形嘅蜂巢形木架上，份外別致，無論賣相定味道都無得輸！
內容目錄
遠離繁囂 休閒度假風
屯門黃金海岸酒店可以喺屯門市中心坐10分鐘車直達，遠離人多車多嘅市區，加上一系列娛樂設施、飲食餐廳、Spa、24小時健身中心、泳池及兒童遊樂場，不失為一個理想嘅度假好去處。
澳洲蜂蜜入饌 獨特三層架
甜蜜「蜂」味下午茶算係小編近來試過最滿意嘅下午茶，因為無論賣相定味道都落具心思。好似六角形三層架，聽酒店員工指，係酒店主廚們精心設計，然後自家製作而成，係出面絕對搵唔到一樣！喺架上放置一件件精美嘅美點，確係幾igable！至於食材，主要都以澳洲蜂蜜為主。眾所周知，澳洲無污染環境，產出嘅蜂蜜特別有名，呢個下午茶不惜功本用上靚蜜糖，可見確有誠意。
✦ 甜點
包括：蜜糖焗迷你紫薯、香梨慕絲配雲呢拿香梨醬及蜜糖啫喱、紅石榴乳酪配蜜糖、伯爵茶慕絲配檸檬蜜糖醬、香蜜雜果仁曲奇條、蜜糖綠茶泡芙配蜜糖啫喱波、蜜糖鬆餅配果醬及奶油忌廉
由於用蜜糖做主題，成個系列甜點嘅比例較多。令我意外係，呢度嘅甜品唔會話好甜，好啱我口味！
個人至愛就係蜜糖焗迷你紫薯，香滑而濃郁嘅紫薯伴以清甜嘅蜂蜜，味道好有層次感！另外，蜜糖綠茶泡芙配蜜糖啫喱波都唔錯，濃郁嘅蜂蜜抹茶蓉，連脆皮泡芙食用，入口即化，好正！至於鬆餅都令我有驚喜，其中一款醬係原件蜂巢！甜而不膩，真係好高質！
✦ 鹹點
包括：松露蜜糖煎帶子菠菜包、照燒雞肉三文治配檸檬蜜糖醬、煙鴨胸配水㰖包及薰衣草蜜糖、蜜糖火腿芝士配迷你牛角酥
鹹點之中，一定係松露蜜糖煎帶子菠菜包最正！大大粒爽口日本帶子，連同清香嘅菠菜包食，成件事好fresh！照燒雞肉三文治配檸檬蜜糖醬，以及煙鴨胸配水㰖包及薰衣草蜜糖都鹹中帶甜，食上口好開胃！
✦ 特飲
包括：蜜糖百香果茶、蜜糖草莓檸檬特飲
兩款特飲都口感酸甜，消滯一流！百香果會偏酸啲，好啱伴濃味鹹點食；草莓檸檬就比較清甜，同甜品夾啲。
編輯評審
味道：3.5
環境：4
服務：4.5
CP值：3.5
（*5為最高分）
【詳情】
甜蜜「蜂」味下午茶
供應日期：即日至3月31日（堂食）
價格：HK$548（2人）
地址：屯門香港青山公路1號香港黃金海岸酒店低層地下
預訂：2452 8833 或瀏覽www.sino-hotels.com
* 另收取加一服務費
