疫情之下，銅鑼灣最近多咗好多靚餐廳、打卡處！而開業約一星期、糖街鬼屋餐廳”Vie Won Won” 就係其中之一！店子大玩Oddities鬼屋元素，古堡色調，加上一系列創意西餐，無論係裝潢或食物質素都令人滿意！
內容目錄
鬼屋娛樂結合餐飲 創可持續發展空間
Vie Won Won老闆娘Matiny與合作夥伴們都鍾意搞鬼玩味嘢。
上年9月，Matiny已經同夥伴喺佐敦搞咗唐樓鬼屋體驗活動，比大家以第一身角度，感受香港嘅都市傳說和原創恐怖故事，為沉悶生活帶嚟刺激！不過，每場體驗45分鐘，每節只招待4個人，喺寸金尺土嘅香港，成本效益無疑係低。為推動本地鬼屋文化，Matiny就打算推出一個結合鬼屋、餐飲及展覽嘅多用途空間，令整件事可以可持續運作。後來，因緣際會搵到糖街呢個大型吉舖，於是立即實行大計。
由設計、裝修、以至菜單設計，均由Matiny與夥伴們親自主理。她表示，興幸團隊有懂得裝修嘅人，可以節省成本，而且一班友人一共裝嵌、上色及製作道具，一步步睇住店舖完工，好有成就感。
色香味俱全 精緻西餐
食物方面，Vie Won Won主要提供Fusion西餐為主，如紫薯飯或抹茶烏冬等，色彩豐富得嚟，賣相都有啲Halloween味！Matiny表示Vie Won Won嘅主廚已經入行11年，一向做開Fine Dining，所以對食物嘅色香味，要求都相當高，唔似時下好多Cafe咁得個樣。
✦ 餐湯與前菜：雜菜湯、水果沙律
雜菜湯偏酸，微辣，每一匙都係滿滿嘅雜菜，相當足料！至於水果沙律，則有紅莓、藍莓、車厘茄及沙律菜，好豐富！配合多樣蔬果，光係餐湯與前菜都非常有營！
✦ 迷你帶子麻辣意大利麵伴魷魚 HK$128
麻辣味意粉好惹味，加上爽口帶子及薄切魷魚條，成件事幾夾，又突出到海鮮嘅鮮味。
✦ 吞拿魚蓉宇治抹茶卡邦尼 HK$128
呢款卡邦尼好特別！個底唔係用意粉，而係烏冬！而且個烏冬好煙韌，口感好好！ 一邊食一邊有少少嘅抹茶香，神來之筆係個吞拿魚蓉，好棉好滑，溝埋一齊食，perfect！
✦ 野菌紫薯飯配香煎石班魚 HK$138
無諗過紫薯可以入飯，整成risotto，口感好綿，香香甜甜咁，非常開胃。石班魚煎得香脆，魚肉彈牙鮮甜，質素唔錯。
✦ 油封鴨脾古斯米漢堡配地瓜薯條 HK$158
米漢堡唔油膩，甜甜地，不過略嫌鴨脾絲乾咗啲，咬入口有啲dry。相對嚟講，地瓜薯條好粉好甜，幾可口。
✦ 烏龍茶熱情果柑橘梳打 HK$68
加咗熱情果同埋柑橘，呢款特飲偏酸，同行嘅友人就好鍾意佢清爽口感，我就一般般啦，不過相信配油膩嘢食食會好夾。
✦ 白朱古力抹茶沙冰 HK$58
雖則加咗朱古力同埋抹茶，但飲上口其實無想像中咁膩，幾順喉，水準及格有餘。
✦ 佛手柑伯爵茶奶凍 HK$68
上層係玫瑰啫喱，下面係佛手柑+伯爵茶奶凍，唔甜，幾滑香，加埋周邊嘅金寶脆脆食，口感豐富。
✦ 白朱古力夏洛逸蛋糕 HK$78
成個蛋糕用料十足，白朱古力慕絲中有層雜莓及手指餅，酸酸甜甜，唔會膩，另外，亦有少少焦糖脆，幾香口。
編輯評審
味道：4
環境：4.5
服務：4
CP值：3.5
（*5為最高分）
【詳情】
鬼混 Vie Won Won
地址：銅鑼灣糖街2-8號102號舖樂聲大廈1/f
IG：@viewonwon (www.instagram.com/viewonwon)
同場加映 陰森鬼屋與怪誕市集
除咗餐廳，Matiny亦表示同層會有鬼屋及市集場地兩部分。不過，鬼屋因配合政府嘅防疫政策，暫時唔會開放住，而市集位置，則買到好多鬼怪周邊，而且呢度仲係嚟緊2月嘅賀歲鬼片《糖街製片廠》嘅拍攝取景點，大家可以喺「糖街戲院」中打卡，非常過癮！
